Kim Jong Un, einræðisherra Norður Kóreu, hrósar þeim hermönnum sem sprengja sig í tætlur frekar en að láta Úkraínumenn handsama sig á vígvellinum. Sagði hann þá vera hetjur.
Breska ríkisútvarpið BBC greinir frá þessu.
Norður Kóreumenn hafa sent Rússum hermenn til þess að taka þátt í innrásinni í Úkraínu. Talið er að þeir séu um 15 þúsund talsins og eru einkum staðsettir á víglínunni í Kursk héraði í norður Úkraínu.
Mannfallið hefur verið gríðarlegt. Talið er að minnsta kosti 6 þúsund þeirra hafi dáið í átökunum og enn fleiri særst. Hvorki yfirvöld í Norður Kóreu né Rússlandi hafa viljað viðurkenna þetta mikla mannfall.
Fjöldi þeirra Kóreumanna sem særst hafa eða orðið innikróaðir í átökunum hafa sprengt sig í loft upp með handsprengjum frekar en að láta taka sig sem stríðsfanga. Einræðisherrann Kim Jong Un hrósaði þessum hermönnum í ræðu í vikunni og lýsti þeim sem „hetjum.“
„Óhikað hafa þeir ákveðið að sprengja sig sjálfa, í sjálfsvígsárás, til þess að verja okkar mikla heiður,“ sagði Un. „Sjálfsfórn þeirra án þess að vænta bóta og hollusta þeirra án þess að vænta umbunar er skilgreiningin á hámarki við hollustu herliðsins okkar.“
Sumir hafa hins vegar verið teknir til fanga eða þá hafa flúið og viljandi látið handsama sig. Þeir fangar hafa sagst hafa fengið fyrirmæli frá yfirboðurum sínum um að drepa sig frekar en að láta ná sér. Það sé landráð að láta handsama sig.
