Bónus fór af stað með nýtt verkefni á þessu ári til að koma til móts við verðandi foreldra. Verkefnið kallast Barnabónus en markmið þess er að styðja við bakið á barnafjölskyldum. Nú þegar hefur Bónus gefið 2500 barnabónusbox og 1600 umsóknir til viðbótar bíða afgreiðslu á haustmánuðum. Andvirði barnaboxanna er ríflega 60 milljónir króna.

Hugmyndin byggir á barnaboxi sem komið var á fót í Finnlandi 1938 til að styðja við foreldra og draga úr fátækt, eins og segir í tilkynningu. 

„Okkar hugmynd er af svipuðum toga og í boxunum eru vörur sem gagnast nýbökuðum foreldrum mjög vel. „Við höfum fengið sjálfboðaliða til að pakka vörunum í boxin og styrkjum á móti félagið Gleym mér ei“, segir Pétur Sigurðsson verkefnastjóri hjá Bónus.

Þá fékk Bónus ljósmóðurina Helgu Reynisdóttur í lið með sér við að velja vörur í boxin.  

Í boxunum eru til að mynda bleiur, blautþurrkur, snuð, krem, tannburstar, náttföt, samfella og tannhringur (naghringur) svo eitthvað sé nefnt.

„Við erum himinlifandi yfir viðtökunum. Við þökkum birgjunum okkar sem eru stoltir af því að taka þátt í verkefninu. Sjálfboðaliðarnir hafa líka unnið afar óeigingjarnt starf og gefið vinnuna sína í þágu Gleym mér ei, sem við erum afar þakklát fyrir,“ segir Pétur.