Íbúar Hafnarfjarðar munu fá tækifæri til að kjósa um hið umdeilda verkefni Coda Terminal þegar ákveðið ferli sem fylgir verkefninu verður klárað. Þetta sagði Valdimar Víðisson formaður bæjarráðs á opnum kynningarfundi, um breytingar á aðalskipulagi bæjarins, nú fyrr í kvöld.

Verkefnið hefur reynst afar umdeilt og fjöldi íbúa bæjarins hefur mótmælt því harðlega. Coda Terminal er á vegum fyrirtækisins Carbfix sem er dótturfyrirtæki Orkuveitu Reykjavíkur. Það snýst í stuttu máli um að taka við miklu magni koltvísýrings og dæla því í jörðu í Straumsvík og næsta nágrenni. Hefur verkefninu meðal annars verið mótmælt á þeim grunni að koltvísýringurinn geti komist í snertingu við grunnvatn.

Valdimar, sem tekur við starfi bæjarstjóra á næsta ári, sagði á fundinum aðspurður um hvort það verði efnt til íbúakosningar um verkefnið:

„Þegar að allt saman liggur fyrir. Vörðurnar það er að segja. Álit Skipulagsstofnunar, eins hvað er í þessu fyrir okkur Hafnfirðinga nákvæmlega, fjárhagslega. Þá verður það auðvitað sett í íbúakosningu að þeirri vinnu lokinni. Þannig að svarið er einfalt, já verkefnið mun fara í íbúakosningu. Gegn því í sjálfu sér að þessar vörður … að við komumst yfir þær allar saman og við kjörnir fulltrúar teljum ásættanlegan samning liggja á borðinu og eins að og allt sé jákvætt eða það er að segja eins jákvætt og hægt getur orðið, þá hvað álit Skipulagsstofnunar varðar. Þannig að, já.“

Fundargestur kallaði þá fram úr sal:

„Já, hvað?“

Valdimar ítrekaði þá svar sitt:

„Það mun fara í íbúakosningu.“