32 ára karlmaður hefur verið dæmdur í tveggja ára óskilorðsbundið fangelsi fyrir nauðgun á hótelherbergi á Austurlandi í desember 2023. Dómurinn féll þann 29. október.
Málið átti sér stað í kjölfar jólagleði sem var haldið á hótelinu en brotaþoli í málinu var þar gestkomandi. Brotið átti sér stað inni á hótelherbergi þar sem brotaþoli var sofandi, en hún þekkti gerandann ekki en vaknaði á meðan brotið átti sér stað.
Dómur í málinu er gífurlega ítarlegur en þar er framburður fjölda vitna rakinn og máluð upp nokkuð skýr mynd af umræddri nótt. Ljóst var að gerandi hafði komið á hótelið eftir að brotaþoli sofnaði. Hann var þangað kominn með sambýliskonu sinni til að hitta kunningja sem deildi herbergi með brotaþola. Voru flest vitni málsins sammála að maðurinn hefði á einhverjum tíma verið inn á herbergi þar sem brotaþoli svar en hann þverneitaði sök í málinu og tók framburður hans ítrekuðum breytingum. Frásögn sambýliskonu hans tók sömuleiðis breytingum en bæði reyndu þau að benda á annan mann, mann sem var á hótelinu og hafði líka verið inn á téðu herbergi, sem þann seka.
Lögregla hafði lagt hald á lak og sent erlendis til erfðafræðilegrar greiningar. Þar fannst erfðaefni úr ákærða en ekki úr þeim manni sem hann reyndi að benda á. Reyndi ákærði að gefa langsótta skýringu á því hvernig þetta mætti vera. Hann hafi átt kynferðisleg samskipti við herbergisfélaga brotaþola og erfðaefni hans þannig smitast í lakið.
Brotaþoli treysti sér ekki til að bera kennsl á ákærða enda var hún vakin úr djúpum sefni, var án gleraugna og í mikilli geðshræringu. Það litla sem hún mundi kom þó heim og saman við lýsingu á ákærða, fremur en lýsingu á þeim manni sem ákærði reyndi að benda á.
Dómari mat frásögn brotaþola mjög einlæga, varfærna og trúverðuga. Öðru máli væri farið með ákærða.
„Að mati dómsins hefur ákærði enga haldbæra og trúverðuga skýringu gefið á hinum sýnilegu lífsýnum sem vísað hefur verið til í rannsóknargögnum lögreglu eða á rannsóknarniðurstöðunni. Hefur ákærði að mati dómsins verið ótrúverðugur í hinum breytta framburði sínum og að auki eru skýringar hans harla ósennilegar í ljósi sérfræðigagnanna. “
Dómari rökstuddi niðurstöðu sína ítarlega og taldi ekki varhugavert að telja ákærða sannan að sök. Brotið væri alvarlegt og þar hafi ákærði sýnt einbeittan brotavilja og brotið á grófan hátt gegn kynfrelsi brotaþola. Hæfileg refsing væri því tvö ár.
Eins hafi ákærði bakað sér bótaskyldu gegn brotaþola. Hún hafi orðið fyrir verulegri tilfinningaröskun og andlegum þjáningum. Miskabætur væru því hæfilegar 2,2 milljónir. Eins þarf ákærði að greiða rúmlega 5,2 milljónir í sakarkostnað. Sakarkostnaður skiptist þannig að rúmlega 700 þúsund krónur eru kostnaður ákæruvalds, skipaður verjandi fær 2,9 milljónir í málsvarnarlaun, 132 þúsund í ferðakostnað og 16 þúsund í útlagðan kostnað. Réttargæslumaður fær tæpar 1,4 milljónir í réttargæslulaun og um 102 þús í ferðakostnað.
Fréttin hefur verið uppfærð
