Tuttugu og sjö ára gamall Reykvíkingur, Óskar Andri Jónsson, hefur verið ákærður fyrir tilraun til manndráps, en til vara sérstaklega hættulega líkamsárás, fyrir að hafa hrint manni niður 23 tröppur fyrir utan veitingastaðinn Moe´s Bar Grill við Jafnasel í Breiðholti.
Maðurinn sem varð fyrir árásinni er erlendur, 42 ára gamall. Í texta ákæru héraðssaksóknara, sem DV hefur undir höndum, segir að Óskar hafi sparkað í bak mannsins þannig að hann féll niður 23 steinsteyptar tröppur. Við fallið höfuðkúpubrotnaði maðurinn og hlaut „dreifðar blæðingar í og við heila beggja vegna, alvarlegan og varanlegan heilaskaða, sem felur í sér hugræna skerðingu, máltruflanir og takmarkaðan málskilning.“
Óskar hefur setið í gæsluvarðhaldi á Litla-Hrauni frá 30. október. Eigandi Moe´s Bar Grill, sem er við Jafnasel í Breiðholti, taldi fyrst að um slys hefði verið að ræða. En skoðun á efni í eftirlitsmyndavél leiddi í ljós að manninum hafði verið sparkað niður tröppurnar, 23 þrep. Brotaþolinn lá lengi meðvitundarlaus eftir árásina en laust fyrir síðustu jól fór hann að geta tjáð sig við lögreglu sem leiddi til þess að skriður komst á rannsóknina.
Í yfirheyrslum lögreglu bar Óskar við minnisleysi, sagðist hann engar minningar hafa um kvöldið sem árásin átti sér stað né dagana á undan.
Aðalmeðferð í málinu verður við Héraðsdóm Reykjavíkur þann 26. apríl næstkomandi. Héraðssaksóknari krefst refsingar yfir Óskari og greiðslu alls sakarkostnaðar.
Fyrir hönd brotaþolans er gerð krafa um miska- og skaðabætur upp á 150 milljónir króna.
