Frumvarp um breytingar á barnalögum á þann veg að börn geti framvegis haft skráða búsetu hjá báðum foreldrum sínum, en ekki aðeins einu, var samþykkt á Alþingi nú rétt eftir hádegi í dag.
Frumvarpið var lagt fram á síðasta þingi en varð ekki að lögum, en hugmyndin margoft verið rædd. Það var samþykkt með öllum greiddum atkvæðum á þingi.
„Það tókst loksins núna – loksins,“ sagði Helga Vala Helgadóttir, þingmaður Samfylkingarinnar á Facebook í kjölfar atkvæðagreiðslunnar.
Með frumvarpinu er foreldrum barns sem ekki búa saman gert kleift að semja um skipta búsetu barns við tilteknar aðstæður. Í frumvarpinu er þá gert ráð fyrir að foreldrar sem semji um forsjá barns semji jafnframt um sameiginlega ábyrgð á framfærslu barnsins.
Mikið er lagt upp úr því í frumvarpinu að litið sé til hagsmuna barnsins og að það fái tækifæri til þess að tjá sinn vilja í samningaferlinu.
Í umsögn með frumvarpinu eru helstu breytingar í því listaðar upp:
- Nýtt ákvæði um heimild til að semja um skipta búsetu barns.
- Lögbundnar forsendur samninga foreldra um forsjá, búsetu og umgengni í viðeigandi lagaákvæðum.
- Nýtt ákvæði um samtal að frumkvæði barns.
- Skýrari ákvæði um rétt barns til að tjá sig.
- Breyting á ákvæðum um framfærslu og meðlag með áherslu á aukið samningsfrelsi foreldra.
Börn munu áfram þurfa að velja að hafa lögheimili á einum stað.
Lögin öðlast gildi 1. janúar næsta árs.
Hin nýsamþykktu lög hafa ekki enn verið birt á heimasíðu Alþingis, en feril frumvarpsins, frumvarpsdrög og breytingartillögur má sjá hér.