Eins og fram hefur komið í fréttum brann húsbíll við Torfastaði í Grafningi í Árnessýslu um helgina. Í bílnum fundust líkamsleifar karlmanns á fertugsaldri. Neyðarlínunni barst tilkynning um eldinn skömmu fyrir miðnætti á föstudagskvöldið. Starfsmaður Neyðarlínunnar vísaði tilkynnanda áfram til lögreglunnar en hún svaraði ekki, síminn hringdi út.

Morgunblaðið skýrir frá þessu í dag. Fram kemur að lögreglunni hafi svo borist tilkynning um bílinn á laugardaginn klukkan 13.30. Þá var bíllinn illa útileikinn og mikið brunninn. Oddur Árnason, yfirlögregluþjónn á Suðurlandi, staðfesti þetta í samtali við Morgunblaðið og sagði að skoðað verði af hverju tilkynningin á föstudagskvöldið hafi ekki skilað sér til lögreglunnar.

Morgunblaðið segist hafa heimildir fyrir að það hafi verið sumarhúsaeigendur í Grafningi sem hringdu í Neyðarlínuna á föstudagskvöldið þegar þeir töldu sig sjá eld hinum megin Sogsins. Þeir töldu sig einnig sjá bremsuljós bifreiðar. Það getur ekki hafa verið húsbíllinn sem brann því framendi hans sneri að vatninu.

Starfsmaður Neyðarlínunnar er sagður hafa vísað tilkynnanda áfram til lögreglunnar en síminn hafi hringt út hjá henni.

Lögreglan rannsakar nú eldsupptökin og verst allra fregna um málið. Morgunblaðið hefur eftir Oddi að allir mögulegir þættir málsins séu rannsakaðir. Lögreglan hefur óskað eftir ábendingum frá vitnum og öðrum sem kunna að vita eitthvað um málið.