Hjólreiðamaður missti stjórn á reiðhjóli sínu á Hvolsvelli á mánudag í liðinni viku með þeim afleiðingum að hann slasaðist illa.
Í skeyti sem lögreglan á Suðurlandi sendi frá sér kemur fram að maðurinn hafi verið hjálmlaus, en talið er að hann hafi nef- og höfuðkúpubrotnað. Maðurinn var fluttur á sjúkrahús til aðhlynningar.
Þá segir lögregla að í tveimur tilfellum hafi hliðarspeglar ökutækja rekist saman. Fyrra tilvikið átti sér stað skammt vestan Ölfusárbrúar á föstudag þar sem Mercedes Benz Sprinter og Ford F350 mættust. Hitt tilvikið var einnig á Suðurlandsvegi en aðfaranótt þriðjudags þar sem hliðarspeglar tveggja flutningabifreiða rákust saman. Í hvorugu tilvikinu urðu slys á fólki.
57 ökumenn voru kærðir fyrir að aka of hratt í umdæminu í vikunni og 2 fyrir að aka undir áhrifum fíkniefna.
