Ljóst er að landslagið á íslenskum smásölumarkaði breytast töluvert með tilkomu Costco. Þá verða áhrifin á fjölda íslenskra fyrirtækja víðtæk. Ráðgjafa- og hugbúnaðarfyrirtækið Zenter hefur farið yfir helstu staðreyndir um starfsemi Costco og umfang verslunarreksturs fyrirtækisins á Íslandi, en þar er einnig reynt að spá fyrir um áhrif á íslenskan markað. Viðskiptablaðið gerir þessu skil í dag.

Um Costco

Bandaríski smásölurisinn Costco mun opna hér á landi í nóvember, ef allt gengur að óskum. Gert er ráð fyrir að framkvæmdir hefjist í byrjun júní. Costco var stofnað árið 1983 og hefur mikill stöðugleiki einkennt fyrirtækið síðan þá. Þannig eru fimm af þeim ellefu, sem skipuðu fyrstu stjórn fyrirtækisins, enn viðriðnir Costco, þar á meðal James Sinegal og Jeffrey Brotman sem voru meðstofnendur. James er forstjóri og Jeffrey stjórnarformaður.

Fyrirtækið hefur selt pylsu og gosglas á þrjá dollara saman allar götur frá árinu 1985. Þrátt fyrir aukinn kaupmátt hefur verðið haldist það sama undanfarin tæp 30 ár. Þessi samsetning virðist nokkuð vinsæl meðal bandarískra neytenda því árið 2010 voru 92 milljónir eininga seldar.

Komu að gerð skýrslunnar

Í samtali við Viðskiptablaðið segir Már Wolfgang Mixa, sem kom að gerð skýrslunnar:

„Í krafti stærðar sinnar getur Costco boðið upp á ýmsar vörur, þar á meðal þekkt vörumerki, á mun lægra verði en íslenskir neytendur hafa mátt venjast hingað til. Ég sé fyrir mér að margir innflytjendur, sem hafa verið með þekkt umboð í lengri tíma, muni finna fyrir komu verslunarinnar hingað.“

Trausti Haraldsson, framkvæmdastjóri Zenter tjáir sig einnig um skýrsluna. Greinir hann frá því að Costco auglýsi lítið sem ekkert en treysti hinsvegar á gott orðspor. Tryggð viðskiptavina er mikil en 91% endurnýjaði kort sín hjá Costco á síðasta ári. Verðlaunar Costco viðskiptavini með ýmsum hætti fyrir tryggð við fyrirtækið.

„Costco hefur verið að gera út á millitekjufólk og fólk með hærri tekjur og ég er ekki viss um að allir Íslendingar geri sér grein fyrir því að þar er til dæmis hægt að fá fatnað frá Boss og Armani, svo dæmi séu tekin.“