Kristín Lilja Sigurðardóttir laganemi og fyrirsæta gekk tískupallana fyrir DIOR á dögunum fyrir sýningu á Fasion Week í París.

„Ég var í rauninni búin að útiloka að ég myndi verða valin í sýninguna, það voru svo margar stelpur sem komu til greina. Svo fékk ég símtalið um að þau hefðu valið mig og ég var eðlilega í skýjunum en líka smá stressuð, enda um eina af stærstu sýningunum að ræða á Fashion Week,“ segir Kristín í samtali við Bleikt.

Kristín starfar sem fyrirsæta í fullu starfi ásamt því að stunda nám við lögfræði.

„Þegar ég var yngri þá hugsaði ég aldrei út í það að verða fyrirsæta í framtíðinni en svo fékk ég tækifæri að koma á samning hjá Eskimo sem er móðurskrifstofan mín. Ég fékk mörg verkefni alveg frá byrjun og fór að finnast þetta skemmtilegt og kynntist nýju fólki. Ég stefni á áframhaldandi feril í augnablikinu, vil grípa tækifærið sem er núna en svo veit maður aldrei hvað framtíðin ber í skauti sér.“

Eskimo kom Kristínu á samning hjá NEXT Management Worldwide og í gegnum þá skrifstofu fór hún í prufu fyrir DIOR.

Aðspurð um upplifunina á því að fá að ganga tískusýningu fyrir svo frægt merki segir Kristín að allt stress hafi horfið daginn sem sýningin fór fram.

„Daginn fyrir sýninguna var ég ennþá að meðtaka það að ég hefði verið valin, þetta var líka fyrsta tískusýningin mín í tískuvikunni í París og allt var svolítið óraunverulegt. Daginn sem sýningin fór fram þá hvarf allt stress. Teymið baksviðs var æðislegt og allir svo almennilegir. Allur dagurinn var yndislegur og mikil spenna í loftinu, þetta var alveg frábær upplifun.“