Íbúar á Flateyri héldu bæjarhátíð sína, Götuveisluna, um Jónsmessuhelgina. Glatt var á hjalla og mikið fjör meðal bæjarbúa. Boðið var upp á fjölbreytta dagskrá föstudagskvöld og laugardag. Áður stóð hátíðin eitt kvöld og bar nafnið Ólafstúnshátíð, en í hittifyrra var nefnd valin og óskað eftir að allir bæjarbúar hjálpuðust að við að skipuleggja bæjarhátíð og árið í ár því það þriðja sem Götuveislan er haldin.

Hátíðin hófst með dúndurtónleikum Bjartmars Guðlaugssonar á hinum víðfræga Vagni á Flateyri, en nýir eigendur Vagnsins taka mót nýju sumri af miklum metnaði, spennandi dagskrá í farvatninu og munu Andrea Gylfadóttir og Sniglabandið spila þar núna um helgina, 30. júní–1. júlí.

Á laugardeginum klæddu stórir sem smáir sig í hina ýmsu búninga, reimuðu á sig hlaupaskóna og tóku sprettinn út Önundarfjörð. Flestir létu sér nægja tvo kílómetra en þrjár ofursprækar súperskutlur tóku fimm kílómetra og það næstum án þess að blása úr nös. Hjónin Jón og Gunna tóku svo á móti hlaupurum, íbúum og gestum í Gunnukaffi með dýrindis pítsusneiðum og gosi og var gerður góður rómur að. Siggi Hafberg bauð síðan upp á kajakferðir fyrir áhugasama.

Opið hús hjá heimamönnum

Það er hefð fyrir því að útvaldir heimamenn opni heimili sín fyrir gestum Götuveislunnar og á meðal þeirra voru hjónin Stanley og Alina Kordek sem buðu gestum að skoða gullfallegan skrúðgarð sem þau hafa af mikilli natni unnið að við húsið sitt.

Veislunni lauk svo með því að splunkuný útigrill voru formlega afhent bæjarbúum af Kvenfélaginu Brynju og fjórum vöskum piltum sem í sameiningu gerðu þennan draum að veruleika, ýmist með aurum eða högum höndum. Á Flateyri taka allir bæjarbúar þátt, með einum eða öðrum hætti. Þegar nálgaðist miðnætti var tendraður lítill varðeldur og við undirleik Jóa hljómaði söngurinn svo undirtók í fjöllunum. Dagskránni var svo lokað á Vagninum þar sem þeir Ari og Birgir sungu og spiluðu fyrir gesti.

Indíáni með hlauparáð Steinunn Einarsdóttir klæddi sig sem indíána í hlaupinu og má ætla að hér sé hún að gefa ungum hlaupurum góð hlauparáð.

Furðuverur á ferð Bæjarbúar klæddu sig í alls konar búninga fyrir hlaupið.

Kjóll og hvolpar Þessi herramaður mætti í kjól með hvolpa.

Skemmtilegt höfuðfat Sæbjörg Freyja Gísladóttir klæddi sig upp í búning fyrir hlaupið.

Brosmild afgreiðslumær Elva Björk Höskuldsdóttir tók á móti gestum í Gunnukaffi.

Tekið á móti gestum Sæbjörg Freyja Gísladóttir og Stanley Kordek í gullfallegum skrúðgarði sem hann og kona hans, Alina, hafa af mikilli natni unnið að við húsið sitt.

Sælureitur Fallegur skrúðgarður Alinu og Stanleys.

Fallegt á Flateyri Það er fallegt um að litast á Flateyri.

Börnin leika sér Börn eru stór hluti af bæjarhátíðum og þessi hér brá á leik þegar ljósmyndara bar að.

Gulu karlarnir Teikningar barnanna prýða þennan vegg.

Hláturjóga Guðrún Jónsdóttir bauð upp á hláturjóga í Minningargarðinum.

Börnin skemmta sér Bæjarhátíðir eru ekki síst fyrir börnin, sem hér hoppa og leika sér.

Tilþrif Þessi ungi maður sýnir tilþrif í vatnsfjörinu.

Blautt gaman Það er alltaf skemmtilegt að skella sér í vatnsfjör.

Rétta lagið fundið Palli Önna mætti á vörubílnum sínum sem breytt var í svið fyrir söngvakeppni. Undirspilið var klárt fyrir þá sem þurftu, en tæknivæddir, smávaxnir söngvarar voru oftar en ekki tilbúnir með sitt í snjalltækjunum.

Gaman saman Þorbjörg Sigþórsdóttir og Hulda María Guðjónsdóttir skemmtu sér vel á Götuveislunni.

Bæjarbúar taka þátt Vel var mætt á Götuveisluna, en á Flateyri búa um 130 manns.

Glatt á hjalla Þétt setið í sumarsólinni og glatt á hjalla.

Söngur við varðeld Undir miðnætti var tendraður varðeldur og sungu bæjarbúar saman svo undir tók í fjöllunum.