Fjölmiðlamaðurinn Logi Bergmann er þekktur hrekkjalómur og hefur strítt ótal vinum sínum í gegnum tíðina. Það kom því vel á vondan á dögunum þegar aðstandendur Myrkra músíkdaga gerðu rækilega at í Loga.

Forsaga málsins er sú að Logi og vinkona hans, Margrét Marteinsdóttir, fyrrverandi dagskrárstjóri á Ríkisútvarpinu, hafa árum saman gert grín sín á milli að Myrkum músíkdögum. „Okkur finnst þetta svo fyndin samkoma því þetta er svo mikið ekki okkar stöff. Þetta byrjaði sem einhver brandari, Margrét að spyrja mig hvað ég ætli að sjá á Myrkum þetta árið og alls konar pælingar sem spunnust út úr því sem er ótrúlega fyndið því ég tengi nákvæmlega ekkert við þetta,“ segir Logi í samtali við DV.

Logi tísti síðan í fyrra eftirfarandi: „Shit hvað mér finnst alltaf fyndið þegar fólk að spila nútímatónlist þykist vera að spila eftir nótum. #myrkirmúsíkdagar“. Þetta skens fór greinilega ekki framhjá aðstandendum hátíðarinnar sem ákváðu að skjóta til baka.

Ætlar auðvitað að fara

Eiginkona Loga, Svanhildur Hólm, lýsti því á Facebook að hún hefði verið að keyra heim á dögunum þegar hún heyrði auglýsingu í útvarpinu um Myrka músíkdaga. Í auglýsingunni var klykkt út með þessum orðum: „Hlökkum til að sjá þig og Loga Bergmann“. „Ég fékk póst um daginn þar sem sagt var að ég ætti hátíðarpassa og gæti boðið einhverjum með. Svo kom þessi útvarpsauglýsing sem var auðvitað stórkostleg. Ég var í sminki, að fara að lesa fréttir, þegar Svanhildur hringdi í mig og hálf gargaði á mig. Ég vissi ekki hvað hefði gerst, ég hélt að eitthvað hefði komið fyrir börnin, henni var svo mikið niðri fyrir,“ segir Logi hlæjandi.

Logi er ákveðinn í að fara enda kann hann að meta gott grín. „Mér finnst þetta ógeðslega fyndið. Ég ætla auðvitað að fara og taka Möggu með, sjá eitthvert stórkostlegt stöff sem ég tengi ekkert við.“