„Ég hef upplifað ýmislegt en þessi dagur er einn sá versti sem ég hef lifað. Þetta var síðasta sumar og ég þurfti að fara til læknis,“ segir Maríanna Hafsteinsdóttir í pistli í Fréttatímanum. Þar deilir hún með lesendum sárri lífsreynslu og hvernig afgreiðslukona gjörbreytti lífi hennar. Forsaga málsins er sú að Maríanna lenti í bílslysi sem varð til þess að smám saman missti hún allan mátt í fótum. Í dag verður hún að nota hjólastól til að komast á milli staða.

Maríanna fór á heilsugæsluna en rafknúni hjólastóllinn komst ekki inn í lyftuna og enginn annar hjólastóll við lyftuna þrátt fyrir lög þar um. Vill Maríanna vekja athygli á aðgengi fyrir fatlaða í ríkisstofnunum. En þarna neyddist Maríanna til að skríða, þá lasin, til að komast til læknis.

„Ég skreið inn í lyftuna og rétt náði að teygja mig upp í takkana. Þegar ég kem upp á aðra hæð skreið ég í gólfinu að afgreiðsluborðinu. Biðstofan var full af fólki og auðvitað störðu allir á mig. Þegar ég komst að afgreiðsluborðinu bauð ég góðan daginn en í stað þess að bjóða góðan dag á móti kallaði afgreiðslukonan til mín; Af hverju stendur þú ekki upp?“

Segir Maríanna að þarna hafi hún átt erfitt með að bresta ekki í grát.

„Ég náði samt að svara henni að ég gæti það ekki áður en ég skreið aftur út því ég gat ekki hugsað mér að skríða áfram til læknisins. Þegar ég kom út úr lyftunni á jarðhæðinni gat ég ekki lengur haldið aftur af táraflóðinu heldur sat bara þarna og grét.“

Afgreiðslukona úr apótekinu kom þá til bjargar og þegar hún heyrði atburðarrásina las hún yfir konunni í afgreiðslu heilsugæslunnar. Þá hringdi hún síðar og lét Maríönnu vita að hjólastóll væri á læknastofunni og hún myndi aðstoða hana í þau skipti sem hún þyrfti á læknisaðstoð að halda.

„Ef ekki væri fyrir þessa konu þá hefði ég misst trúna á mannkynið.“

Í myndskeiði hér fyrir neðan, þar sem fjallað er um slæmt aðgengi fatlaðra að ríkisstofnunum, má sjá leiðina sem Maríanna skreið umræddan dag sem hefst á mínútu 15:00.

Hér má lesa pistilinn í heild sinni.

[youtube https://www.youtube.com/watch?v=bWbtrDxDw4s&w=640&h=360]