Nýjasta verk Rúnars Rúnarssonar, O (Hringur), með Ingvari E. Sigurðssyni í aðalhlutverki, verður heimsfrumsýnt á kvikmyndahátíðinni í Feneyjum í dag. O (Hringur) keppir þar um aðalverðlaunin í flokki stuttmynda. O (Hringur) er ljóðræn frásögn af manni sem vill standa sig en hans helsta hindrun er hann sjálfur.

„Það er mikill heiður að myndin okkar var valin hingað og hefur það þegar haft mikil áhrif á áframhaldandi dreifingu myndarinnar. Þetta er auðvitað ótrúlegt ævintýri. Það var hæfileikaríkur hópur sem kom að gerð þessarar myndar og erum við þeim þakklát. Margir úr sama hóp gerðu einnig með okkur Ljósbrot. Þetta hefur hefur verið sannkallað ævintýri,“
segir Rúnar.

Í nýrri stiklu fyrir myndina má heyra frumsamda tónlist eftir Kjartan Sveinsson tónskáld myndarinnar, sem oft er kenndur við Sigurrós.

Það hefur verið skammt stórra högga á milli hjá Rúnari í ár en í vor frumsýndi hann kvikmyndina Ljósbrot sem opnunarmynd á Kvikmyndahátíðinni í Cannes og hlaut myndin standandi lófaklapp áhorfanda í fimm mínutur sem og frábæra dóma kvikmyndagagnrýnenda. Til að mynda hafa helstu kvikmyndatímarit heimsins, Hollywood Reporter og Screendaily, sett Ljósbrot á sína lista yfir bestu myndirnar á þessari Cannes hátíð. Einnig hefur Ljósbrot unnið fimm alþjóðleg kvikmyndaverðlaun og verið valin í forval til Evrópsku kvikmyndaverðlaunanna.

Ljósbrot er einmitt í íslenskum kvikmyndahúsum þessa daganna og mun O (Hringur) vera sýnd í Bíó Paradís frá og með deginum í dag á undan Ljósbroti.

Þetta er í áttugasta og fyrsta skiptið sem hin árlega kvikmyndahátíð í Feneyjum fer fram sem gerir hana eina þá elstu í heiminum. Jafnframt er Feneyjahátíðin, ásamt Cannes, talin önnur af tveimur virtustu og mikilvægustu kvikmyndahátíðum heimsins. Þar safnast saman kvikmyndamógúlar, leikstjórar og heimsfrægir leikarar, sem ganga rauða dregilinn og fara á heimsfrumsýningar.