Ekkja manns sem lést á hræðilegan hátt þegar hann festist inni í helli árið 2009 hefur mátt þola svívirðingar á samfélagsmiðlum allar götur síðan. Einkum vegna þess að hún giftist aftur og hélt áfram með líf sitt.
Konan heitir Emily Jones Sanchez og var gift hellakönnuðinum John Edward Jones sem lést í hellinum Nutty Putty í Utah fylki í Bandaríkjunum í nóvembermánuði árið 2009. Emily var þá ófrísk af öðru barni þeirra.
Málið vakti mikla athygli fjölmiðla á sínum tíma. En John, sem var 26 ára gamall, skreið niður í þröngan afkima hellisins sem kallast „fæðingarvegurinn.“ Hann sat þar fastur á hvolfi í 25 klukkutíma áður en hann lést vegna þrýstingsins. Björgunaraðgerðir voru reyndar en reyndust árangurslausar.
Það var ekki einu sinni hægt að sækja lík John vegna þeirrar hættu sem það skapaði björgunarfólki sem þurfti að skríða langa leið í mjög þröngum hellinum. Líkið hefur því setið fast í hellinum í bráðum fimmtán ár. Hellinum var innsiglað eftir slysið og óheimilt er að fara inn í hann.
Eftir dauða John eignaðist Emily soninn sem hún bar undir belti. Seinna kynntist hún öðrum manni, Donovan Sanchez, og eignaðist barn með honum.
Emily hefur nú greint frá því í viðtali við staðarblaðið Deseret News að hún verði fyrir stöðugu áreiti á samfélagsmiðlum, aðallega frá ókunnugu fólki.
Í athugasemd við eina mynd sem Emily birti af sér og eiginmanni sínum árið 2020 skrifaði einn einstaklingur: „John var betri!“ og „HÍF John. Ef ég væri eiginkona þín hefði ég aldrei fundið annan svona fljótt og myndi vera að deila þinni sögu og þínu lífi, birta færslur um þig.“
Annar netverji spurði á mjög ágengan hátt: „Ég er að pæla, þegar þú deyrð og ferð til himna, hverjum verður þú með?“ og „Það hryggir mig mjög hversu mikið fólk einblínir á hamingju í þessu lífi í stað þess að halda út og bíða þess að verða sameinað á nýjan leik.“
Enn annar spurði: „Veit dóttir Emily og John að hann sé í raun faðir hennar?“
Önnur skilaboð eru jafn vel enn skrýtnari. Svo sem fólk sem skrifar um að John hafi eftir dauða sinn sent einhvern til þess að sjá um Emily og börnin.
Aðrir koma henni þó til varnar. „Að missa einhvern er nógu erfitt, sérstaklega ef þú þarft að ganga í gegnum óléttuna ein, sjá börnin þín og vera minnt á hvað kom fyrir pabba þeirra,“ segir einn svo dæmi sé tekið.
Emily sjálf sagði að Donovan ætti ekki í neinum vandræðum með að ræða málefni John. Honum þætti það ekki óþægilegt.
„Hann veit að börnin þurfa að muna eftir pabba sínum og hann á ekki í neinum erfiðleikum með að vera í samskiptum við Jones fjölskylduna. Hann elskar þau,“ sagði hún.
