Myndin var upphaflega birt á Instagram-síðu Katrínar og Vilhjálms Bretaprins og stuttu síðar var hægt að ná í myndina á öllum helstu ljósmyndaveitum. Stuttu síðar afturkölluðu veiturnar myndina því það hafði einhver „átt við hana.“ Krónprinsessan steig stuttu síðar fram og viðurkenndi sök.
Undanfarið hafa samsæriskenningar verið á sveimi um heilsu Katrínar og hefur þetta myndafíaskó aðeins ýtt undir þær kenningar,
Sjá einnig: Helstu ljósmyndaveitur afturkalla nýjustu myndina af Katrínu krónprinsessu – Þetta er ástæðan
Katrín gekkst undir kviðarholsaðgerð í janúar og var tveimur vikum seinna útskrifuð af einkarekinni heilsugæslustöð í Lundúnum. Í tilkynningu frá Kensingtonhöll á sínum tíma kom fram að Katrín myndi vera frá í nokkra mánuði og myndi ekki snúa aftur til konunglegra starfa fyrr en eftir páska. Í lok febrúar átti Vilhjálmur að mæta í minningarathöfn guðföður síns, Konstantíns II, konung Grikklands, en hætti við með stuttum fyrirvara. Margir töldu þetta skýra vísbendingu um að heilsu Katrínar hafði hrakað og að Vilhjálmur þyrfti að vera hjá henni.
Samsæriskenningar fóru á flug, eins og að hún væri fárveik að berjast fyrir lífi sínu, þar sem engin formleg skýring barst brá Kensingtonhöll.
Katrín virtist reyna slökkva í þessum kenningum með því að láta sjá sig opinberlega fyrir viku síðan, í fyrsta sinn í tvo mánuði.
Sjá einnig: Lét sjá sig í fyrsta sinn í tvo mánuði og afsannaði villtar samsæriskenningar
Eins og fyrr segir hefur umrædd mynd af Katrínu og börnum hennar vakið gríðarlega athygli og virðast allir og amma þeirra hafa einhvers konar kenningu um hvað sé málið. Katrín birti yfirlýsingu í gær og viðurkenndi að hafa átt við myndina. Það hefur aðeins hellt olíu á eldinn hjá samsæriskenningasmiðum. Kenningin sem hefur fengið hvað mestar undirtektir er að Katrín hafi notað gamla mynd af sér, mynd sem var á forsíðu Vogue árið 2016.
„Mín niðurstaða er sú að þeir tóku andlit hennar úr Vogue myndatökunni og settu það á nýju myndina,“ sagði Ruby Naldrett, starfsmaður hjá Daily Mirror og Daily Star.
Sumir netverjar voru sammála en aðrir bentu á að myndin væru svona lík einfaldlega því þetta væri sama konan.
„Bíddu, ertu að segja að mynd af Katrínu hertogaynju sé lík annarri mynd af Katrínu?“ sagði einn kaldhæðinn netverji.
„Þetta er bara sama andlitið með sama brosið, því þetta er sama konan,“ sagði annar.
Helstu ljósmyndaveitur heims, þar á meðal Getty, Reuters, AP og AFP, dreifðu myndinni en sendu síðan skilaboð til fréttamiðla um að hætta að nota hana vegna þess að líklega hafi verið „átt við hana“.
Katrín tók á sig sökina í kjölfarið. „Eins og margir áhugaljósmyndarar þá á ég til með að prófa mig áfram að breyta myndum. Ég vil biðjast afsökunar á ruglingnum sem myndvinnslubreytingar mínar orsökuðu. Ég vona að allir hafi átt góðan mæðradag.“
