Þórhallur Steingrímsson og kona hans Rosa Maria Gomes Rodrigues urðu svo lánsöm að verða afi og amma tveggja barnabarna í sitthvorri heimsálfunni í gær. Annað barnið fæddist í Brasilíu og hitt í Danmörku.
„Okkur fannst þetta æðislegt,“ segir Þórhallur. „Það gekk allt vel.“
Þórhallur og Rosa eru búsett á Íslandi sem stendur en hyggjast flytja til borgarinnar Rio í Brasilíu í júní næstkomandi, þaðan sem hún er.
Þau eru rík af börnum. Eiga þrjá íslenska stráka og tvo brasilíska. Fyrir daginn í gær áttu þau svo samtals þrjú barnabörn. Þórhallur segist mikill Liverpool aðdáandi og hefur innrætt barnabörn sín af miklum móð.
Einn hinna íslensku sona, Steingrímur Karl, eignaðist son með konu sinni Andreu í Danmörku. Sama dag eignuðust Tiago og Roberta dóttur í Brasilíu. Báðar mæður voru gegnar fram yfir. Roberta var sett þann 10. janúar og Andrea þann 14. janúar.
Þórhallur og Rosa höfðu verið í heimsókn í Danmörku um jólin og ræddu þá þann möguleika að börnin myndu fæðast á sama tíma. „Við hugsuðum það um daginn að það væri nú gaman ef börnin kæmu sama daginn,“ segir Þórhallur.
Eins og áður segir þá stendur til að Þórhallur og Rosa flytjist til Brasilíu í sumar. Þórhallur bendir á að bæði Ísland og Brasilía eigi það sameiginlegt að vera að kljást við ógnaröfl náttúrunnar um þessar mundir. Hér séu jarðhræringar í Grindavík en í Rio mikil flóð þar sem flætt hefur inn í hús og gert þúsundir heimilislausa.
„Þetta fólk fær ekkert frá ríkinu,“ segir hann.
