Katrín og Stefán eru gestir vikunnar í Fókus, spjallþætti DV. Þau fara um víðan völl og ræða um það sem er fyrir handan, hvernig draugagangur lýsir sér, hvernig er hægt að losna við drauga og þeirra fyrstu reynslu að sjá eitthvað að handan. Þau fara einnig yfir staði á Íslandi þar sem reimleikar eru og eftirminnilegustu upplifanir þeirra, eins og þegar þau náðu röddum á upptöku í Hvítárnesskála eða þegar Stefán vaknaði við að sjá huggulegan prest standa yfir sér, sem dó fyrir mörgum árum.
Horfðu á brot úr þættinum hér að neðan, það er hluti af nýjasta þætti af Fókus sem má horfa á í heild sinni hér.
Einnig er hægt að hlusta á Spotify eða hlaðvarpsþjónustu Google.
Það er allur gangur á því hvar draugagang er að finna segja hjónin.
„Það getur verið svo margt og mikið,“ segir Katrín.
„Það getur verið hvað sem er en yfirleitt eru það staðir þar sem mikil umferð á sér stað. Til dæmis eins og hótel, þar sem margir koma, eru að skilja eftir sínar orkur og jafnvel vandamál, síðan kemur bara næsti og næsti, kemur gleði og alls konar tilfinningar,“ segir Stefán og bætir við:
„En svo er líka draugagangur stundum tengdur slysum eða dauðsföllum sem eiga sér stað skyndilega, þar sem viðkomandi áttar sig ekki endilega á því hvað var að gerast. Dauðdaginn kannski svolítið hraður, en það á vissulega ekki við um alla.“
Þau nefna nokkra þekkta staði hér á landi þar sem þau segja mikla reimleika vera.
„Sko ég myndi segja að Höfði sé í uppáhaldi. Reimdasti staðurinn held ég bara hreinlega, að mínu mati, er framhaldsskólinn á Laugum,“ segir Stefán.
„Svo myndi ég líka segja Hvítárnesskáli. Það var rosa mikill draugagangur þar, ég veit ekki hvort það sé reimdasti staðurinn.“
Í gegnum tíðina hafa verið ýmsar sögur á kreiki um draugagang í Höfða og telja margir eitthvað dularfullt vera þar á sveimi. Reimleikarnir hafa oft verið tengdir við einn af fyrrum íbúum hússins, Einar Benediktsson skáld.
Upp úr 1950 urðu sögur af draugagangi í húsinu sífellt fleiri og varð það meðal annars til þess að þáverandi sendiherra Breta sá sig tilneyddan til að flytja þaðan út. Höfðadraugurnn svo kallaði varð síðan frægur á níunda áratugnum þegar leiðtogafundur Reagans og Gorbatsjovs fór fram í húsinu.
Katrín og Stefán voru með þætti á Hringbraut fyrir tveimur árum og gerðu sérstakan þátt um drauginn á Höfða.
Fylgdu Draugasögur á Instagram og hlustaðu á hlaðvarpsþætti þeirra á Spotify. Einnig er hægt að skrá sig í áskrift hjá þeim fyrir meira efni.
Katrín og Stefán eru einnig með þættina Sannar íslenskar draugasögur (smelltu hér fyrir áskrift eða hlustaðu á Spotify) og Mystík (smelltu hér fyrir áskrift eða hlustaðu á Spotify).
