Því miður er ljótleika og grimmd víða að finna í veröldinni en blessunarlega eru miklu fleiri dæmi um gleði og hlýju þó að þau fari ekki eins hátt. Eitt skýrasta dæmið um þessa tvo póla eru örlög tveggja lamba frá bænum Refsmýri á Fellunum, rétt fyrir utan Egilsstaði.
Fyrr í sumar greindi DV frá því að ófögur sjón hefði blasað við Agnesi Klöru Ben Jónsdóttur, sauðfjárbónda á Refsmýri, einn júnímorgun. Fyrir framan eldhúsgluggann mátti finna líkamsleifar tveggja vikna lambs, sem hafði verið skotið, flegið og skorið rétt fyrir utan bæinn. Aðkoman var ógeðfelld en líkur eru á að ferðamenn hafi drepið lambið sér til matar eins og hverja aðra villibráð eins og kom fram í síðari fréttum um málið.
Nú hefur annað lamb á bænum vakið athygli en fyrir allt aðrar sakir. Heimalningurinn Höskuldur Glódís hefur brætt hjörtu TikTok-notenda vegna þeirrar staðreyndar að hann heldur að hann sé hundur.
„Hann fannst á næsta bæ, móðurlaus, og endaði því í pelagjöf hjá okkur. Fyrst um sinn vorum við með hann í fjárhúsinu en að lokum var hann bara kominn hingað upp í bæinn til okkar,“ segir Agnes Klara.
Þau búa fjögur á bænum og yngsta dóttir Agnesar Klöru, Glódís, vildi ólm að lambið yrði nefnt eftir henni sjálfri. „Það passaði þó kannski ekki alveg því að þetta er lambhrútur. Við nefndum hann því Höskuld út í loftið og bættum svo nafni dóttur minnar við – Höskuldur Glódís,“ segir Agnes Klara kímin.
Eins og gefur að skilja tók heimilisfólk fljótt ástfóstri við Höskuld Glódísi en hjarta hans var fljótlega frátekið, að minnsta kosti að hluta, fyrir tvo hunda á bænum, Stacy og Kjolle, sem eru sleðahundar af samoyed-kyni en af rússnesku og hollensku bergi brotin. Þaðan eru nöfn þeirra sprottin.
„Hann tók strax ástfóstri við þau og var fljótur að byrja að sofna í fletinu í forstofunni með þeim á nóttunni. Hann hegðar sér eins og þau að mestu leyti og virðist halda að hann sé hundur.“
Að hennar sögn hafa hundarnir tekið þessum nýja samlita hundi, en með óvenjulegu ullargreiðsluna, afar vel. „Höskuldur Glódís fær bara lúxusmeðferð hjá þeim. Stacy og Kjolle þrífa hann í gríð og erg og sleikja mjólkina sem lekur meðfram munnvikunum þegar hann fær pela,“ segir Agnes Klara.
Samlífið á bænum er því með miklum ágætum fyrir utan kannski þá staðreynd að Höskuldur Glódís er ekki áhugahrútur um snyrtilegar salernisvenjur. „Hann veður alltaf inn í hús um leið og hurðin er opnuð. Svo pissar hann bara og kúkar þar sem honum sýnist,“ segir Agnes Klara en eðli málsins samkvæmt er reynt að halda slíkum heimsóknum lambhrútsins í lágmarki – forstofan og bæjarlandið er hans griðarstaður.
@agnesjonsdottir Höskuldur our motherless lamb 🐏 #sheep #dog #nordurdals #samoyed #fy #love #lamb #farm ♬ You Got A Friend In Me (From „Toy Story“) – Just Kids