Fyrirsætan Brooklyn Beckham og leikkonan Nicola Anne Peltz gengu í það heilaga þann 9. apríl síðastliðinn. Eins og nafnið gefur til kynna er Brooklyn sonur fyrrverandi knattspyrnumannsins David Beckham og kryddpíunnar Victoria Beckham. Það var því við að búast að brúðkaupið yrði mikilfenglegt og dýrt, sér í lagi þar sem faðir Peltz, Nelson, er afar efnaður bandarískur fjárfestir.
Brúðkaupið, sem haldið var í Los Angeles, kostaði alls um 3 milljónir dollara, það gera rúmlega 389 milljónir í íslenskum krónum. Nýgiftu hjónin náðu þó að spara aðeins með matnum sem gefinn var gestum þegar að kvöldi var komið. Brúðkaupsgestir fengu nefnilega mat frá skyndibitakeðjunni Wendy’s.
Í brúðkaupinu var matartrukkur frá Wendy’s sem deildi ostborgurum og kjúklinganöggum til brúðkaupsgesta. Stakur ostborgari kostar tæpar 400 krónur en naggarnir eru á um 500 krónur. Gera má því ráð fyrir því að brúðhjónin hafi náð að spara ágætis summu á því að bjóða upp á skyndibitann frekar en hefðbundnari brúðkaupsmat.
„Við borðuðum ekki neitt þangað til Wendy’s trukkurinn kom og þá fékk ég mér þrjá borgara,“ segir Peltz í viðtali nýgiftu hjónanna við Vogue. „Þetta var hugmyndin mín, hin fullkomna rúsína í pylsuendann,“ segir Beckham.
Ástæðuna fyrir því að Wendy’s trukkurinn var valinn fram yfir aðra skyndibita má að hluta til rekja til þess að faðir Peltz er einn stærsti fjárfestirinn í Wendy’s. Auk þess er hann stjórnarformaður fyrirtækisins.