Það getur verið kvöl og pína að kljást við leiðinlega nágranna. Okkur hefur flestum dreymt um að senda nágranna okkar vel vönduð skilaboð en látum fæst verða að því. En stundum skal gott heita og það er bara ekki annað í stöðunni en að kvarta.
Kona greinir frá því í myndbandi á TikTok að nágranni hennar hafði haldið fyrir henni vöku í fjóra daga vegna kynlífshávaða. Hún skrifaði nágrannanum bréf og fékk í kjölfarið besta mögulega svarið. Myndbandið hefur vakið mikla athygli á samfélagsmiðlinum og einnig erlendum fjölmiðlum.
Konan skrifaði nágranna sínum bréf sem var svo hljóðandi: „Hæ. Ég myndi alveg rosalega kunna að meta það ef þið gætuð fært rúmið ykkar frá veggnum. Þetta er orðið að daglegum viðburði og það er mjög erfitt fyrir mig að sofna við þessi læti. Kærar þakkir, nágranni ykkar.“
Hún bætti svo neðst við bréfið. „Hávaðamengun= Stunur, þegar rúmið skellur upp við vegginn. Takk, hehe.“
Konan setti miðann undir hurðina hjá nágrannanum og vonaði að hann myndi einfaldlega minnka hávaðann. En hann gerði gott betur.
Þegar hún kom heim seinna sama dag fann hún bréf frá nágranna sínum. „Ég biðst afsökunar á ónæðinu. Ég mun standa mig betur að hafa hemil á hljóðstyrk mínum.“
Ekki nóg með það þá fylgdi einnig sex þúsund króna gjafabréf á Starbuck með afsökunarbeiðninni.
Netverjar hrósuðu nágrannanum hástert fyrir frábær viðbrögð. Þess væri óskandi að allir nágrannar væru svona.
