Áhrifavaldurinn og söngkonan Camilla Rut Arnardóttir mætti í morgunþáttinn Ísland vaknar á K100. Hún ræddi um málefni sem hún brennur fyrir, unað kvenna. Hins vegar voru ekki allir þáttastjórnendur sáttir með þessa umræðu og virtist Jón Axel, einn af þremur þáttastjórnendum eiga ansi erfitt með hana. Hann skildi ekkert í því af hverju Camilla og Kristín Sif, þáttastjórnandi Ísland vaknar, væru að ræða um þetta í útvarpi.

„Hvaða kjaftæði er þetta?“

„Mér er svolítið annt um þessa umræðu sem skapast í kringum unað kvenna, vegna þess að það er sorglegt hlutfall að tala um hvað eru margar konur sem sjá kynlíf sem einhvers konar skyldu eða kvöð, sérstaklega konur í langtímasamböndum. Ég væri alveg til í að opna meira á þessa umræðu,“ segir Camilla Rut

„Ég og vinkonur mínar tölum mjög mikið um þetta og leggjum mikla áherslu á þetta, sama og ég í mínu hjónabandi.“

„Hvaða kjaftæði er þetta?“ Spyr þá Jón Axel.

Kristín Sif og Camilla útskýra þá að það séu margar konur sem fá sjaldan eða fá aldrei fullnægingu í kynlífi. „Þurfið þið eitthvað að leggjast í það mál,“ spyr hann og veltir því fyrir sér hvort þetta sé ekki eitthvað sem konur eiga bara að spá í sjálfar.

„Auðvitað. Við bara erum í stöðu í samfélaginu og getum opnað á þessa umræðu og getum reynt að hvetja konur til að kynnast sjálfri sér og vita hvað þær vilja,“ segir hún og spyr svo Jón Axel: „Af hverju horfirðu svona á mig?“

Unaður kynja misjafn

Camilla segir að það sé greinilegt að Jón Axel eigi erfitt með þessa umræðu en lætur það ekkert á sig fá og heldur ótrauð áfram.

„Unaður kvenna og karla er það misjafn, það sem þarf til hjá konum er bara miklu meira,“ segir hún.

„Já hefurðu verið karl eða?“ Spyr Jón Axel.

„Nei en been there done that. Við þurfum svolítið að þekkja inn á sjálfa okkur, vita hvað við viljum og setja okkur í fyrsta sæti hjá okkur sjálfum. Ekki vera hræddar við að þekkja líkama okkar, snerta hann,“ segir hún.

Þetta er ekki í fyrsta sinn sem Camilla Rut og Jón Axel eru ósammála. Í maí rökræddu þau um húsmæðraorlof og varð þeim ansi heitt í hamsi.

Sjá einnig: Húsmæðraorlof Camillu gerði allt vitlaust – „Veistu hvað, nú þarft þú að fara að passa þig“

Þú getur hlustað á viðtalið hér að neðan.