Rapparinn ástsæli Emmsjé Gauti greindi frá því í dag að hann væri búinn að „unfollowa“ nokkurn veginn alla Instagram-aðganga sem hann fylgdi áður. Þetta kom fram á hans eigin Instagram-aðgangi í dag.

Emmsjé Gauti er nú með um það bil 20 þúsund fylgendur, en fylgir sjálfur einungis sjö. Þessir sjö aðgangar sem hann fylgir eru í nafni vörumerkja og fyrirtækja sem hann tengist á einn eða annan hátt.

Hann útskýrði hvers vegna hann hefði „unfollowað“ alla aðganganna, en hann segist lengi hafa ætlað að gera eitthvað í samfélagmiðlanotkun sinni. Hann skrolli um netið klukkutímum saman og finnist sniðugt að gera þetta bæði fyrir sjálfan sig og börnin sín.

Gauti segist þó ætla að halda áfram að nota aðganginn, en nú verði hann frekar notaður til að einblína á tónlistina.

Yfirlýsing Emmsjé Gauta var eftirfarandi.

„Ég hef lengi lofað sjálfum mér að taka til í social media málum. Ég er að bösta sjálfan mig aftur og aftur við það að eyða heilu klukkutímunum í að skrolla niður í tómið. Mig langar að eyða minni tíma símanum, bæði fyrir mig og til að setja gott fordæmi fyrir börnin mín. Ég ætla að gera það í skrefum, það skilar alltaf mestum árangri. Ég unfollowaði alla hér á instagram en mun nota accountinn til að fókusa meira á músíkina og með því“