Í tilkynningunni, sem er frá árinu 2005, er verið að auglýsa skráningu í nýjan hóp á vegum kirkjunnar fyrir 6 ára krakka en hópurinn ber heitið KKK. Það er vægast sagt ansi óheppilegt heiti á námskeiði þar sem KKK er betur þekkt sem skammstöfunin fyrir samtökin Ku Klux Klan.
Ku Klux Klan er þekkt fyrir rasisma, ofbeldi og voðaverk en samtökin halda því fram að hvíti kynstofnin hafi yfirburði fram yfir aðra kynstofna. Ku Klux Klan er hvað þekktast fyrir hatur sitt gagnvart svörtu fólki, en einnig fyrir gyðinga- og hommahatur sem og fyrirlitningu á ýmsum öðrum minnihlutahópum.
„KKK, stendur fyrir ,Kátir krakkar í kyrruviku,“ segir hins vegar í tilkynningu kirkjunnar en um er að ræða eins konar þemadaga. „Börnum í 1. bekk grunnskóla er boðið að taka þátt í þessari sérstöku dagskrá kirkjunnar. Við ætlum að föndra, fara í leiki og fræðast um þá atburði sem tengjast dymbilvikunni.“ Þessi dymbilvika sem talað er um er vikan fyrir páska en hún hefst á Pálmasunnudegi.
Þrátt fyrir að „Kátir krakkar í kyrruviku“ stuðli og innihaldi ágætan hrynjanda þá hefði eflaust mátt finna annað nafn á hópinn. Þegar talað er um KKK er nefnilega ansi ólíklegt að fyrsta hugsun manns séu kátir krakkar.