Í helgarblaði DV eru sögur á bak við nokkur víðfræg Eurovision-lög frá Íslandi rifjuð upp, með annars lagið Sjúbídú. Söngkonan Anna Mjöll Ólafsdóttir samdi lagið Sjúbídú með föður sínum, Ólafi Gauki heitnum, fyrir Eurovision-keppnina í Ósló árið 1996. Anna Mjöll söng sig í þrettánda sæti.
Sjá einnig: Mikill þrýstingur á Jóhönnu Guðrúnu að sýna meira hold – Átti enga möguleika nema í „stuttum, flegnum kjól“.
„Sjónvarpið hafði samband við mig og spurði hvort ég væri til í að semja lag fyrir Eurovision. Mér fannst þetta mikill heiður og sagði strax já, hringdi síðan í pabba og sagði: HJÁLP,“ segir Anna Mjöll og hlær. Hún var þó ekki eini einstaklingurinn sem RÚV hafði samband við það árið og voru keppinautarnir allt annað en vinsamlegir við feðginin. „Ég held að þeir hafi beðið þrjá einstaklinga að semja lög þetta árið. Einn keppinautur okkar mætti í stúdíóið á meðan við vorum að taka upp í Reykjavík og sýndi allar sínar verstu hliðar, en það breytti engu fyrir okkur,“ segir Anna Mjöll.
„Hugmyndin fæddist frá öllum fyrirmyndunum mínum; Ellu Fitzgerald, Frank Sinatra, Elvis – sem öll sungu Sjúbídú. Pabbi samdi síðan þennan glerfína texta við lagið,“ segir hún og bætir við að stórstjarnan Svavar Gestsson hafi veitt þeim mikla hvatningu í þessu Eurovision-ævintýri.
„Svavar Gests skrifaði pabba fallegt bréf um þessa textasmíð. Bréfið var alla tíð eftir það uppi á vegg í gítarskólanum hans pabba.“
Anna Mjöll hugsar hlýtt til þessarar Eurovision-reynslu, en móðir hennar, Svanhildur Jakobsdóttir, tók einnig virkan þátt í þessu batteríi.
„Eurovision-reynslan hafði mikla og góða þýðingu fyrir okkur öll. Pabbi útsetti stórkostlega fyrir stórhljómsveitina í Noregi. Tónlistarmennirnir þökkuðu honum fyrir bestu útsetninguna það árið. Mamma sá um blaðamenn og alla pressuna svo hún var á endalausum hlaupum út um allt að redda öllu. Það sást eiginlega ekkert í hana þessa viku sem við vorum í Noregi. Þetta var mikill heiður enda mjög skemmtileg lífsreynsla.“