DV fékk spákonu til að rýna í árið 2020 og má finna spána í heild sinni í Völvublaði DV. Eftirfarandi er stuttur bútur úr spánni.

Þessi stétt er dauð

Nú vill völvan fara að einbeita sér að dægurmálunum. Áhrifavaldar eru henni efst í huga.

„Nýja stéttin okkar, áhrifavaldar, nær ekki flugi og heyrist lítið frá þeim á árinu og framvegis,“ segir hún. „Þeir reka sig á að ekki er endalaust hægt að ginna fólk og hvetja til alls kyns vitleysu. Þessi stétt er dauð og skilur ekkert eftir sig nema athyglissjúkt fólk og manneskjur sem háðar eru fegrunaraðgerðum,“ bætir hún við og verður heitt í hamsi.

„Ég veit ekki hvað þið DV-liðar gerið við fasta liðinn Vikan á Instagram því úr litlu verður að moða,“ segir hún og rekur ritstjórann í rogastans að völvan fylgist með slíku.

„Ég þekki þetta fólk. Sunneva Einars er ein af fáum sem spjarar sig því hún er komin inn í Engeyjarættina. Hún klárar sitt nám og gengur í lið með fjármálaöflum. Hún heldur áfram að bæta sig í ræktinni og auglýsa hitt og þetta. Varðandi annan klókan áhrifavald, Manuelu Ósk, sé ég hana fara í enn frekari bisness og umsvif á fasteignamarkaði. Hún er ansi klár og spjarar sig vel,“ segir völvan. „Svo eru það hinir; Þórunn Ívars, Ernuland, Aron Mola og hvað þetta lið allt heitir. Það verður gleymt þegar árið er liðið.“

Völvuspána í heild sinni má lesa í Völvublaði DV.