Fyrir ári síðan birti fjármála- og efnahagsráðuneytið uppfærðar afkomuhorfur og spáði því að ríkið yrði rekið með halla næstu fimm árin. Tekjur yrðu lægri en ráðgert hafði verið og vaxtagjöld hærri.

Þannig var staðan þegar fyrri ríkisstjórn fór frá – eftir áralanga óstjórn í ríkisfjármálum – og ríkisstjórn Kristrúnar Frostadóttur tók við.

Hvað hefur gerst síðan?

Við höfum lögfest stöðugleikareglu og sett þannig útgjaldavexti ríkisins skorður með lögum.

Við höfum lækkað ríkisskuldir um 7,5% af vergri landsframleiðslu, með vel heppnaðri sölu á Íslandsbanka og uppgjöri á skuldbindingum Íbúðalánasjóðs.

Við höfum samþykkt fjármálaáætlun um að ná niður hallarekstri hraðar en fyrri ríkisstjórn ætlaði sér, m.a. með réttlátum auðlindagjöldum og 100 milljarða aðhaldi á útgjaldahlið.

Þetta þýðir að á næsta ári verða lögð fram fyrstu hallalausu fjárlögin í tíu ár.

Allt hefur þetta áhrif á lánshæfishorfur ríkisins, væntingar og traust til hagstjórnarinnar.

Vextir hafa lækkað fimm sinnum á einu ári og verðbólga ekki verið lægri síðan 2020.

Fyrir dæmigerða fjölskyldu með 40 milljóna óverðtryggt íbúðalán þýða þessar fimm vaxtalækkanir 60 þúsund krónum lægri afborganir í hverjum mánuði.

Verðbólga og vextir munu áfram lækka ef við höldum okkar striki.

Höfundur er umhverfis-, orku- og loftslagsráðherra.