Yfirgnæfandi meirihluti kjósenda vill að Alþingi skipi rannsóknarnefnd sem taki til skoðunar störf embættis sérstaks saksóknara og annarra opinberra aðila sem komu að rannsókn og málsmeðferð sakamála í kjölfar fjármálahrunsins 2008.

Eyjan hefur undir höndum niðurstöður skoðanakönnunar sem Gallup vann fyrir Steinþór Gunnarsson, sem nýlega var sýknaður í Landsrétti í Ímon-málinu svonefnda eftir að hafa verið ranglega sakfelldur í Hæstarétti fyrir áratug.

Steinþór var sakfelldur bæði í héraði og í Hæstarétti fyrir markaðsmisnotkun í starfi sínu sem forstöðumaður verðbréfamiðlunar Landsbankans í aðdraganda hrunsins 2008. Var honum gefið að sök að hafa kynnt kaup Ímons á hlutabréfum í bankanum sem raunveruleg viðskipti en ákværuvaldið hélt því fram að um sýndarviðskipti hefði verið að ræða.

Héraðsdómur dæmdi Steindór til níu mánaða óskilorðsbundinnar fangelsisvistar árið 2014 en hann áfrýjaði til Hæstaréttar sem staðfesti ári síðar dóm héraðsdóms en ákvað að sex mánuðir af níu yrðu skilorðsbundnir.

Í könnuninni kemur fram að tæp 72% þeirra sem tóku afstöðu eru hlynntir því að skipuð verði rannsóknarnefnd til að fara yfir störf sérstaks saksóknara og annarra opinberra aðila í hrunmálunum. Andvígir eru ríflega 28%.

Einu gildir hvort horft er til aldurs, kyns, búsetu, menntunar eða tekna. Allir hópar vilja fá rannsóknarnefnd.

Einnig var spurt hvort fólk væri tilbúið að skrá nafn sitt á rafrænan undirskriftalista, þar sem nafnleynd er í boði, til að skora á Alþingi að skipa slíka rannsóknarnefnd.

Niðurstöðurnar þar voru enn meira afgerandi en í fyrri spurningunni. Tæplega 80% eru fús til að skrifa undir slíkan undirskriftalista en einungis ríflega 20% ófús.