Nýjustu tölur úr Íslensku æskulýðsrannsókninni 2024, sem framkvæmd er af Háskóla Íslands fyrir mennta og barnamálaráðuneytið, sýna jákvæða þróun í líðan og velferð barna á Íslandi. Mælingarnar benda til að andleg líðan barna hafi batnað verulega á undanförnum tveimur árum, félagsfærni þeirra aukist, og þátttaka í íþróttum og tómstundum sé vaxandi. Einnig hefur einelti minnkað, sérstaklega hjá eldri börnum, sem dregur fram mikilvægi þeirra úrræða sem hafa verið innleidd.

Ásmundur Einar Daðason, mennta- og barnamálaráðherra, segir þennan árangur meðal annars tengdan stefnumótun og aðgerðum sem byggja á nýrri löggjöf, farsældarlögunum svokölluðu, sem hann beitti sér fyrir. Lögin hafa það að markmiði að tryggja börnum samþætta þjónustu og snemmtækan stuðning. Ásmundur Einar segir að með farsældarlögunum hafi verið tekin stór skref til að bæta þjónustu við börn og fjölskyldur þeirra, meðal annars með aukinni fjárfestingu í fjölbreyttum stuðningsúrræðum.

Hann segist hafa lagt áherslu á að efla enn frekar þessa jákvæðu þróun og ná betur til barna í viðkvæmum hópum. „Niðurstöður rannsóknarinnar gefa okkur raunverulegar vísbendingar um að stefnumótun okkar er að skila árangri og börnum okkar líður betur,“ segir ráðherrann, sem segist vilja sjá áframhaldandi fjárfestingu í velferð barna.

Niðurstöðurnar undirstrika að hans mati einnig mikilvægi þess að mæta áframhaldandi áskorunum, einkum á sviði stafræns öryggis og andlegrar heilsu eldri stúlkna og áhættuhegðunar ungmenna, til að tryggja öruggt og stuðningsríkt umhverfi fyrir öll börn og ungmenni á Íslandi.