„Biluð plata,“ segir Hildur Björnsdóttir, borgarfulltrúi Sjálfstæðisflokksins og oddviti flokksins í kosningunum í vor, um frétt þess efnis að byrjað verði að taka á móti 12 mánaða gömlum börnum í leikskóla Reykjavíkur í haust.

Samkvæmt fréttatilkynningu frá Reykjavíkurborg verður byrjað að taka á móti 12 mánaða börnum í leikskóla borgarinnar í haust og mun innritun í þau pláss hefjast síðar í þessum mánuði. „Hér birtist enn á ný dæmigert kosningaútspil Samfylkingarinnar í Reykjavík,“ segir Hildur um tilkynninguna í færslu sem hún birtir á Facebook-síðu sinni.

„Kosningar eftir kosningar lofar borgarstjóri öllum börnum leikskólavist við 12 mánaða aldur, en efndirnar eru engar. Borgarstjóri hefur fyrir löngu glatað öllum trúverðugleika gagnvart foreldrum í málinu.“

Hildur er ekki sú eina sem furðar sig á þessu loforði borgarinnar. Aðalsteinn Kjartansson, fréttamaður á Stundinni, birti færslu á Twitter-síðu sinni í dag þar sem hann segist vonast eftir því að tveggja ára barnið sitt fái þá kannski líka pláss í haust með eins árs börnunum.

Bind þá vonir við að 24 mánaða barnið mitt fari bráðum að komast að 🤞🤞 pic.twitter.com/9b8BokcbvP

— Aðalsteinn (@adalsteinnk) March 3, 2022

Hildur segist ætla að gera það að sérstöku forgangsmáli sínu að leysa biðlistavanda leikskólanna. „Tryggja þarf öllum börnum öruggt leikskólapláss við 12 mánaða aldur. Þar duga ekki orðin tóm. Verkefnið þarf að setja í hendur fólks sem þekkir veruleika foreldra leikskólabarna – og hikar ekki við að framkvæma,“ segir hún.

Að lokum segir Hildur að það sé kominn tími fyrir breytingar í Reykjavík. „Það er kominn tími á nýtt fólk og nýjar áherslur í borginni. Ég minni á prófkjör Sjálfstæðisflokksins sem fer fram dagana 18. og 19. mars næstkomandi. Ég gef kost á mér í 1. sæti listans.“