Þetta sagði Flemming Splidsboel Hansen, sérfræðingur hjá Dansk Institut for International Studier, í samtali við Jótlandspóstinn í gær um stöðu mála í Úkraínu.
Í gær fyrirskipaði Pútín hækkað viðbúnaðarstig þeirra rússnesku viðbragðssveita sem hafa aðgang að kjarnorkuvopnum og þegar hann tilkynnti um innrásina í Úkraínu í síðustu viku hótaði hann að beita kjarnorkuvopnum gegn ríkjum sem kynnu að blanda sér í stríðið í Úkraínu.
Í gær var einnig tilkynnt að sendinefndir Rússa og Úkraínumanna muni funda við landamæri Hvíta-Rússlands. Jótlandspósturinn spurði Hansen hvað þetta þýði í raun en hann hefur fylgst vel með rússneskum og úkraínskum stjórnmálum árum saman og þekkir því vel til mála.
Hann sagði að þetta væri merki um að Rússar séu að tapa stríðinu. Þeir geti ekki einu sinni náð borg, sem er nærri rússnesku landamærunum, á sitt vald og það sýni að rússnesku hersveitirnar séu í vanda. Rússar hafi vænst þess að geta lagt Úkraínu undir sig á skömmum tíma en það hafi reynst vera tálsýn. Strax á öðrum degi stríðsins hafi Rússar verið reiðubúnir til samningaviðræðna og á fjórða degi séu þeir tilbúnir með sendinefnd til viðræðna við Úkraínumenn. „Þetta er Pútín að reyna að bjarga því sem bjargað verður,“ sagði hann.
Aðspurður um hvort taka beri Pútín alvarlega þegar hann hótar að beita kjarnorkuvopnum sagði Hansen að það verði að taka það mjög alvarlega en sagðist um leið ekki telja ástæðu til að óttast að staðið verði við hótunina. Enn standi vonir til að einhver skynsemi sé til staðar meðal æðstu manna í hinu pólitíska kerfi í Rússlandi. „Það eru vaxandi umræður um hvort skynsemin ráði ekki ríkjum hjá Pútín,“ sagði hann. Aðspurður um hvort hann telji að Pútín hafi einfaldlega misst vitið sagðist hann telja að Pútín taki málið mjög inn á sig persónulega. Hann sé vanur að vera ískaldur og yfirvegaður en þegar hann talaði í síðustu viku hafi verið eins og tilfinningarnar hefðu meiri áhrif. Það sé eitthvað sem geti haft áhrif á ákvarðanatöku hans og skýrt af hverju hann ákvað að ráðast á Úkraínu. „En það er ljóst að ef tilfinningarnar hafa áhrif á Pútín þá er erfitt að spá fyrir um hvað gerist,“ sagði Hansen einnig.
