Fyrstu tölur voru rétt í þessu tilkynntar í prófkjöri Sjálfstæðismanna í suðvesturkjördæmi. Flokkurinn náði fjórum þingmönnum inn á þing í síðustu kosningum. Niðurstöður síðasta prófkjörs sem haldið var í kjördæminu, árið 2016, þóttu heldur karlægar og var því brugðið á það ráð að færa Bryndísi Haraldsdóttur upp listann. Fór þá svo að Vilhjálmur Bjarnason sem hafði tryggt sér öruggt þingsæti í prófkjörinu færðist niður listann og datt út af þingi.
Samtals greiddu 4.700 atkvæði og talin hafa verið 1.419 af þeim, eða um þriðjungur greiddra atkvæða.
Allir sitjandi þingmenn kjördæmisins raða sér í efstu fjögur sætin, og má því búast við, að óbreyttu, að þingmenn Sjálfstæðisflokksins í kraganum verði þeir sömu og voru síðast. Í baráttusætinu, svo að segja, er Arnar Þór Jónsson, héraðsdómari.
Það er þó alls ekki útséð með niðurstöðurnar, því aðeins munar örfáum atkvæðum á að Arnar Þór ýti sér upp í þriðja sætið og ýti þeim Bryndísi og Óla Birni niður. Vænta má að neglur verði nagaðar í kosningapartýi Arnars Þórs fram að næstu tölum, hið minnsta.
Efstu sex sætin eru svona eftir fyrstu tölur:
Í fyrsta sæti er Bjarni Benediktsson formaður flokksins og sitjandi oddviti kjördæmisins með 1.169 atkvæði, eða 82% talinna atkvæða. Afgerandi forysta það.
Jón Gunnarsson er í öðru sæti.
3. Bryndís Haraldsdóttir
4. Óli Björn Kárason
5. Arnar Þór Jónsson
6. Sigþrúður Ármann
Röðun sex efstu frambjóðenda er tilkynnt. Athygli vekur að Vilhjálmur Bjarnason kemst ekki á blað.
