Morgunblaðið skýrir frá þessu í dag. Jón Þór, sem er formaður nefndarinnar, og Andrés Ingi hafa verið sakaðir um trúnaðarbrest eftir fundinn. Á hann mætti Halla Bergþóra Björnsdóttir, lögreglustjóri á höfuðborgarsvæðinu, og svaraði spurningum nefndarmanna um samtöl sín við Áslaugu Örnu Sigurbjörnsdóttur, dómsmálaráðherra, á aðfangadag í tengslum við mál Bjarna Benediktssonar, formanns Sjálfstæðisflokksins og efnahags- og viðskiptaráðherra, en hann hafði sótt samkvæmi á Þorláksmessukvöld þar sem grunur lék á að sóttvarnarreglum hefði ekki verið framfylgt.
Málið komst í hámæli þegar fjölmiðlar fengu tilkynningu frá lögreglunni að morgni aðfangadags, svokallað dagbók lögreglunnar, þar sem fram kom að „háttvirtur ráðherra“ hefði verið í samkvæmi sem lögreglan stöðvaði. Áslaug Arna ræddi síðan tvisvar við Höllu Bergþóru á aðfangadag um málið.
Eftir fund stjórnskipunar- og eftirlitsnefndar sögðu Jón Þór og Andrés Ingi að tilefni væri til að skoða samskipti Áslaugar og Höllu betur miðað við það sem Halla hefði sagt. Þeir hafa verið gagnrýndir fyrir þessi ummæli og sagðir hafa túlkað svör Höllu frjálslega og að hafa rofið trúnað sem gildir um lokaða fundi. Aðrir fundarmenn hafa sagt að ekkert í svörum Höllu hafi bent til að Áslaug hafi gert annað en að óska eftir upplýsingum á grundvelli yfirstjórnunar- og eftirlitsheimilda. Sjálf sagði Halla daginn eftir fundinn að hún telji ekki að ráðherra hafi haft afskipti af rannsókn sakamáls hjá embættinu.
