Áfengisverð á Íslandi þykir hátt á heimsmælikvarða og samkvæmt úttektum hefur bjórglasið hér hefur verið með því dýrasta í heimi undanfarin ár.

Það svíður eflaust mörgum í augu að sjá íslenskt Reyka vodka á spottprís í Bandaríkjum Norður- Ameríku, meðan hér á landi þarf að punga út töluverðri upphæð fyrir samskonar magn.

Eyjunni barst ábending með mynd af 750 millilítra Reyka flösku, sem var til sölu í áfengisbúð í Kaliforníuríki. Kostar hún þar 19 dollara á tilboðsverði, sem eru 2370 íslenskar krónur.

Í Vínbúðum ÁTVR er ekki boðið upp á 750 millilítra flösku, en þar kostar hinsvegar 700 millilítra flaska 6,700 krónur, en lítraverðið er 9,570 kr.

Verðmunurinn er því 4330 krónur og má því kaupa næstum þrjár flöskur ytra, fyrir verð einnar á Íslandi.

Þess má geta að áfengisgjaldið hækkaði í byrjun árs og er nú rúmar 151 krónur á hvern sentilítra af sterku áfengi.

Af gefnu tilefni skal tekið fram að samkvæmt nýjustu rannsóknum er öll neysla áfengis ekki bara skaðleg heilsunni, heldur lífshættuleg.

Sjá nánar: Öll áfengisneysla sögð lífshættuleg samkvæmt viðamikilli rannsókn:„Við þurfum að horfast í augu við það að áfengisneysla er dauðans alvara“