Samningurinn sem Már Guðmundsson, þáverandi seðlabankastjóri, gerði við Ingibjörgu Guðbjartsdóttur, þáverandi framkvæmdastjóra gjaldeyriseftirlits bankans upp á 18 milljónir króna, er óeðlilegur og fram úr hófi segir Sigurður Kári Kristjánsson, lögmaður, bankaráðsmaður Seðlabanka Íslands og fyrrverandi þingmaður Sjálfstæðisflokksins.
„Ég get bara talað fyrir sjálfan mig, en eins og málið horfir við mér þá tel ég að þessi samningur sé mjög óeðlilegur. Hann er úr öllu hófi samkvæmt öllum hefðbundnum mælikvörðum. Ég hef miklar efasemdir um að seðlabankastjóri hafi á þessum tíma haft heimild samkvæmt lögum til að gera þennan samning,“
segir Sigurður Kári við Fréttablaðið og tekur þar með undir orð Gylfa Magnússonar, formanns bankaráðs Seðlabankans.
Már Guðmundsson, fyrrverandi seðlabankastjóri, telur ekkert óeðlilegt við samninginn. Már segir að Ingibjörg hafi sýnt „stjörnuleik“ í störfum sínum fyrir bankann, en hún kom þó ekki að starfa fyrir bankann að námi loknu. Már sagði að samningurinn væri ekki sá eini sinnar tegundar, hvorki í viðskiptalífinu né í seðlabankanum, þar sem margir slíkir hafi verið gerðir þar, bæði í hans tíð og áður.
Sjá nánar: Már réttlætir leynisamninginn og sér ekki eftir neinu- „Ekkert óeðlilegt við þetta“
