Það vakti athygli fyrir helgi þegar fréttir bárust af því að Arnór Sigurðsson hefði ekki verið valinn í hópinn hjá enska B-deildarliðinu Blackburn fyrir átökin á seinni hluta tímabils.

Íslenski landsliðsmaðurinn hefur verið að glíma við meiðsli en snýr brátt aftur. Blackburn tjáði honum tíðindin eftir að félagaskiptaglugganum í helstu deildum Evrópu hafði verið skellt í lás. Arnór var sleginn eftir að hafa fengið fréttirnar.

„Fyrst og fremst finnst mér það bara óheiðar­legt hjá félaginu, hvernig þeir gera þetta. Ég hef alltaf verið fag­maður í þessu, alltaf gefið mig allt mitt í þetta fyrir félagið en síðan ákveða þeir að gera þetta svona. Bíða eftir að félag­skipta­glugginn lokar og til­kynna mér þetta svo. Þeir setja mig í ómögu­lega stöðu. Ég er að renna út á samning eftir tíma­bilið og er búinn að vera meiddur. Það er kannski auðvelt að henda manni burt þegar að maður ætlar ekki að endur­semja,“ sagði Arnór meðal annars við Vísi á föstudag.

Þetta var tekið fyrir í útvarpsþættinum Fótbolta.net á X-inu um helgina. Þar voru vinnubrögð Blackburn gagnrýnd harðlega.

„Í staðinn fyrir að þakka honum fyrir góð störf í janúar og leyfa honum að finna sér nýtt lið. Þetta er eitthvað það aumingjalegasta sem ég hef séð, ekkert smá döpur framkoma,“ sagði Tómas Þór Þórðarson þar.

„Þetta hljómar eins og þetta sé hugsunarleysi og fúsk hjá þeim. Það virðist vera að þegar að átti að skila inn leikmannahópnum eftir janúargluggann hafi þeir bara fattað að það væri ekki pláss fyrir alla mennina,“ sagði Elvar Geir Magnússon þá.