Mikið hefur verið fjallað um styrki til stjórnmálaflokka undanfarnar vikur eftir að í ljós kom að Flokkur fólksins hafði þegið slíka styrki án þess að eiga á því rétt.

Málið má rekja til breytinga sem voru gerðar á lögum um styrkina fyrir nokkrum árum sem gerðu þá kröfu að stjórnmálaflokkar sem njóta styrkja séu skráðir sem stjórnmálasamtök hjá Ríkisskattstjóra. Flokki fólksins láðist að breyta skráningu sinni og er því enn skráður sem frjáls félagasamtök.

Þingmenn Sjálfstæðisflokksins hafa gengið hart fram í gagnrýni sinni á Flokk fólksins en nú greinir Vísir frá því að þingmennirnir séu að kasta grjóti úr glerhúsi því Sjálfstæðisflokkurinn hafi sjálfur þegið 167 milljónir í styrk árið 2022, áður en skráningunni var breytt.

Áslaug Arna Sigurbjörnsdóttir sagði í Bítinu á Bylgjunni í morgun að Flokkur fólksins ætti að skila styrkjunum. Vísir bendir á að þessi afstaða sé áhugaverð í ljósi þess að Sjálfstæðisflokkurinn breytti ekki skráningu sinni fyrr en 8. apríl 2022 og var því ekki skráður sem stjórnmálasamtök þegar styrkjum var úthlutað í janúar 2022.

Vinstri græn hafi ekki breytt skráningu fyrr en í september á síðasta ári og því þegið rúmlega 266 milljónir í styrki á árunum 2022-2024 án þess að uppfylla skilyrði.

Eins hafi Sósíalistaflokkurinn ekki breytt skráningu fyrr en í nóvember 2023 og því fengið um 50 milljónir í styrki árin 2022 og 2023 án þess að vera skráður sem stjórnmálasamtök.