Frosti Logason fjölmiðlamaður og eigandi Brotkast hefur ekki mikla trú á að Valkyrjustjórnin verði að veruleika. Eins og alþjóð veit hafa formenn Samfylkingarinnar, Viðreisnar og Flokks fólksins, fundað síðan á þriðjudag og hafa viðræður gengið vel að þeirra sögn.
„Eins og ég sagði á þriðjudaginn þá er þetta eins og við séum að horfa á eitthvað leikrit.“
Segir hann minna þetta á þegar Gísli Marteinn Baldursson og Hanna Birna Kristjánsdóttir fóru á sjúkrabeð Ólafs F. Magnússonar og báðu hann að mynda stjórn með sér og hafi lofað að gera hann að borgarstjóra. „Svo stungu þau hann í bakið nokkrum mánuðum seinna og mynduðu stjórn með Birni Inga.“
„Ég fæ svona smá á tilfinninguna þegar ég sé þær Valkyrjurnar þrjár saman, með hana Ingu Sæland. Ég veit að eftir hlátur kemur grátur. Inga Sæland er glaðhlakkaleg, svo þegar hún fær rýtinginn í bakið í næstu viku þegar Þorgerður og Kristrún segja „Sorrí þetta gengur ekki upp við verðum að mynda stjórn með öðrum“. Þá verður Inga alveg brjáluð, hún mun bæði gráta, öskra.
Segir hann Ólaf F. allar götur síðan hafa talið um skítapakkið sem stakk hann í bakið og Inga muni verða eins. Segir hann líka vilja hjá Valkyrjunum þremur að mynda fyrstu ríkisstjórnina sem leidd er eingöngu af konum. „Og líka þær hugsa: „Væri ekki frábært hjá okkur að mynda ríkisstjórn þar sem Sjálfstæðisflokkurinn er útilokaður?“ Það er svona ákveðið blæti hjá þessu fólki að vilja kenna Sjálfstæðisflokknum um allt sem illa fer og það sé sjálfstætt markmið að halda honum frá stjórn. Og geta montað sig af því að hafa verið fólkið sem gat haldið Sjálfstæðisflokknum utan stjórnar. En er það í sjálfu sér svo göfugt markmið? En ég veit það er eflaust einhver vilji þarna til að þetta gangi upp en ég held að raunveruleikinn eigi eftir að banka upp hjá þeim og leiða til þess að þessi niðurstaða….ég er sammála Smára að það er ólíklegt að þetta takist.“
