Ungfrú Ísland, sem er undankeppnin fyrir Miss Universe keppninnar alþjóðlegu, er stolt af því að Ungfrú Ísland 2024, Sóldís Vala Ívarsdóttir, hlaut boð um að taka þátt í góðgerðarviðburði Smile Train í Miami, Flórída, en það eru góðgerðarsamtök sem hjálpa börnum um allan heim sem fæðast með skarð í vör og þurfa læknisaðstoð og aðgerðir. Eingöngu 15 keppendur Miss Universe hlutu slíkt boð og var því mikill heiður fyrir Ísland að eiga þar fulltrúa. Sóldís stóð sig með stakri prýði og jók hróður Íslands með frammistöðu sinni.
Um viðburðinn hafði Sóldís þetta að segja: „Þetta var mjög ánægjuleg upplifun og ég er stolt af því að nafn Íslands hafi fengið að tengjast viðburðinum. Starf Smile Train er ómetanlegt og ég legg nafn mitt með glöðu geði við samtökin.“
Sóldís hefur sannarlega verið á faraldsfæti undanfarnar vikur en hún hafði nýlega verið í Bandaríkjunum sem er liður í undirbúningi fyrir aðalkeppni Miss Universe. Ferð hennar á viðburð Smile Train kom strax í kjölfar þeirrar ferðar. Aðrir viðburðir og frekari undirbúningur bíður svo Sóldísar en keppendur leggja mikið á sig til að koma sem best fyrir og hámarka þá upplifun sem keppnin er. Eigandi og framkvæmdastjóri Ungfrú Ísland, Manuela Ósk Harðardóttir, segir í því samhengi: „Valdefling kvenna er boðskapur keppninnar og ég stend stolt að baki undankeppninni á Íslandi til að tryggja að rödd Íslands fái sinn sess á þessu stóra sviði sem aðalkeppnin er. Um leið fylgir þessu auðvitað álag en allir segja að lífsreynslan sé ómetanleg og lærdómurinn mikill, enda er það tilgangurinn.“
Aðstoðarframkvæmdastjóri keppninnar, Elísa Gróa Steinþórsdóttir, sem jafnframt er sigurvegari keppninnar árið 2021, bætir við: „Sóldís gerir okkur afskaplega stolt og teymið okkar stendur þétt að baki henni á þessari jákvæðu vegferð sem hún er á. Gleymum því ekki að Sóldís er bara 18 ára en lætur ekki vefjast fyrir sér að lenda frá Bandaríkjunum eldsnemma morguns og innan 12 tíma vera komin í annað flug þangað aftur.“
