Allt stefndi í löðursveitt kúrekaball á laugardaginn þegar gestir Bíó Paradísar klæddu sig í kögurbuxurnar og settu upp hattinn til þess að fjölmenna á frumsýningu heimildarmyndar um íslenska kántrýsöngvarann Johnny King. Heimildarmyndin í leikstjórn Árna Sveinssonar, segir frá gömlum kántrýsöngvara sem er á krossgötum í lífinu. Í myndinni gerir hann upp áhugaverða fortíð sína sem er eins og myllusteinn um háls hans.

Kúreki Norðursins, sagan af Johnny King, var lokamynd sameiginlegrar heimildamyndaveislu sem Skjaldborg – hátíð íslenskra heimildamynda á Patreksfirði og IceDocs alþjóðleg heimildarmyndahátíð á Akranesi buðu upp á í Bíó Paradís um helgina sem leið. Þar voru sýndar vinningsmyndir frá hvorri hátíð en myndin hlaut einmitt Ljóskastarann, dómnefndarverðlaun Skjaldborgar, í ár.

Húsvíkingurinn Jón Oddi Víkingsson, þekktur sem Johnny King, átti skrautlegan og skemmtilegan feril sem kántrýsöngvari og var þekktur um miðjan níunda áratuginn. Síðastliðin ár hefur myndatökumaður fylgt honum við hvert fótmál en Johnny King vakti mikla athygli þegar hann birtist í kvikmynd Friðriks Þórs, Kúreka Norðursins sem kom út árið 1985.

Patrik Ontkovic og Valli Gísla festu stemninguna á mynd.

Nánar um myndina sem nú er í sýningum í Bíó Paradís.