Lík hinnar 29 ára Zaliya Shamigulova, sem var rússnesk, fannst nýlega illa leikið og nakið í grunnri gröf á Máritus. Talið er að hún hafi verið stungin til bana af manni sem hún komst í samband við í gegnum stefnumótaforritið Tinder. Hann er grunaður um að hafa skorið tunguna úr henni.

Metro skýrir frá þessu og segir að krufning hafi leitt í ljós að fjöldi stungusára var á líkinu, auk þess sem tungan hafði verið skorin úr.

Heimamaður, hinn 29 ára Puryavirsingh Sundur, er nú í haldi, grunaður um að hafa myrt Shamigulova. Er hann sagður hafa játað að hafa myrt hana.

Heimildarmenn innan lögreglunnar segja að hann hafi játað að hafa stungið Shamigulova ítrekað og leikið lík hennar illa. Síðan gróf hann hana í grunnri gröf í íbúðarhverfi sem heitir Marie. Í fyrstu ætlaði hann að hluta líkið í sundur en þess í stað gróf hann það.

Lögreglan leitar enn að ákveðnum líkamshlutum og hluta af fatnaði Shamigulova. Það var blóð, sem fannst í bíl Sundur, sem kom upp um hann.

Rússneskir miðlar segja að Sundur hafi farið með Shamigulova í skoðunarferð um eyjuna en skyndilega hafi mikil afbrýðissemi gripið hann og hafi hann þá dregið upp hníf og myrt hana.