Brauðtertan er klárlega í hópi þjóðarrétta Íslendinga og nú hyggst Brauðtertufélag Erlu og Erlu, einn af vinsælli Facebook-hópum landsins, hefja leit að Íslandsmeistaranum í brauðtertugerð.

Til þess að sem flestir geti tekið þátt verða þrír keppnisdagar í boði, á morgun sunnudaginn 14. júlí í Reykjavík og aftur viku síðar og síðan 28. júlí á Akureyri.

Dómnefnd keppninnar skipa eftirfarandi: Mar­grét Dórót­hea Sig­fús­dótt­ir, fyrr­ver­andi skóla­stjóri Hús­stjórn­ar­skól­ans, Sig­ríður Örvars­dótt­ir, safn­stjóri Lista­safns­ins á Ak­ur­eyri, Tóm­as Her­manns­son, út­gef­andi hjá Sög­um út­gáfu og Erla Hlyns­dótt­ir, frá Brauðtertu­fé­lagi Erlu og Erlu.

Er ætlunin að gefa síðan út bók með bestu tertunum sem líta dagsins ljós í Íslandsmótinu.

Verðlaunin eru einkar glæsileg:

Fyrir Íslandsmeistarann: Gjafabréf að verðmæti 120.000 kr frá Icelandair
Fyrir fallegustu brauðtertuna: Gjafabréf að verðmæti 15.000 kr frá Jómfrúnni

Fyrir bragðbestu brauðtertuna: Martusa, sikileysk ólífuolía beint frá bónda. 5 lítrar

Fyrir frumlegustu brauðtertuna: Bretti frá Kokku, tilvalið fyrir brauðtertur.

Sérstök aukaverðlaun, fyrir brauðtertu sem við mælum með að para með kampavíni: Kampavín, Drappier Brut Nature frá Sante

Enn er hægt að skrá sig til þátttöku inni á áðurnefndum Facebook-hóp, Brauðtertufélag Erlu og Erlu.  Þátttakendur fá síðan tölvupóst með öllum nánari upplýsingum en einnig er hægt að senda póst á braudterta2024@gmail.com.