Grínistinn Anna Dooley ferðaðist nýlega um ástralskan flugvöll og deildi mynd á Instagram þar sem hún bendir á háttsemi fjölmargra ferðalanga, sem hún segir pirrandi og hugsunarleysi gagnvart öðrum. 

Þetta er eitthvað sem við könnumst öll við, þegar ferðamenn standa alveg upp við farangursbeltið og hindra þar með aðra í að sjá sinn farangur, og eru síðan fyrir öðrum sem vilja koma sinni tösku af farangursbeltinu.

„Ef allir myndu taka nokkur skref aftur á bak, þá geta allir séð töskurnar, í stað þess að þurfa að rýna á milli fólks, sjá svo töskuna sína, og þurfa að ryðjast fram hjá fólki til að ná að grípa hana,“ sagði annar ferðalangur á Reddit.

„Og fólk færir sig ekki þó það sjái að þú átt í erfiðleikum með að grípa töskuna þína. Ég ferðast oft og með ferðatösku. Ég skil þetta ekki. Þú ert ekki að missa neinn tíma með því að standa í meters fjarlægð frá farangursbeltinu, en þú hindrar sýn annarra ef þú gerir það ekki.“

„Þetta eru líklega sömu ferðamenn sem standa upp um leið og vélin lendir og blokka flugvélarganginn þó að þeir séu í fertugustu röð.“

Einn netverji benti á að vandinn væri flugvellinum að kenna sem ætti að vera með skýrt kerfi í gangi til að koma í veg fyrir að fólk stæði fyrir öðrum. „Það ætti að vera 1,5 metra svæði sem þú getur ekki farið inn á fyrr en taskan þín er sýnileg og innan seilingar.“