„Þetta var mjög gott ár að mörgu leyti. Það endaði ekki jafn skemmtilega og það byrjaði en svona er boltinn,“ sagði Glódís Perla Viggósdóttir, landsliðsfyrirliði, við 433.is.

Glódís var valin íþróttakona ársins í Íþróttavikunni, vikulegum þætti hér á síðunni, og kom í spjall að því tilefni.

Miðvörðurinn varð þýskur meistari með Bayern Munchen í vor og var þá gerð að fyrirliða stórveldisins á árinu.

„Það er alltaf gaman þegar maður vinnur fyrsta titilinn í nýju landi. Það er alltaf sérstakt á sinn hátt. Það var mjög gaman þegar ég vann í Svíþjóð og mjög stórt í Þýskalandi líka. Það voru kannski aðeins stærri hátíðarhöld hjá Bayern, með karlaliðinu og það var aðeins stærra bíó,“ sagði Glódís sem finnur fyrir aukinni ábyrgð með bandið.

„Ég geri það alveg. Þetta er fyrst og fremst gríðarlega mikill heiður en líka gríðarlega mikil ábyrgð. Það er gaman að fá þetta hlutverk og leiða stelpurnar inn á.“

Glódís spilaði 90 mínútur í hverjum einasta leik Bayern á árinu og er nú komin í stutt frí.

„Það var reyndar svolítið kærkomið, ég viðurkenni það. Ég var orðin svolítið þreytt í síðasta leiknum. En ég hef verið gríðarlega heppin með meiðsli og annað og hugsa vel um mig. Þetta er eitthvað sem ég get verið stolt af, að vera alltaf til staðar fyrir liðið sitt.“

Íslenska kvennalandsliðið átti kaflaskipt ár en endaði það vel. Hvernig horfir landsliðsárið við Glódísi?

„Þetta var svolítið upp og niður. Við vorum að fara í gegnum gríðarleg kaflaskipti, mikið af reynslumiklum leikmönnum sem hættu og þær voru að skilja eftir sig gríðarlega stór skörð sem tók smá tíma að fylla. Við fengum mikið af nýjum, ungum leikmönnum og auðvitað tekur tíma fyrir þær að líða vel og opna sig en undir lok árs fannst mér eins og allir væru að ná að blómstra betur, að við værum að ná að tengja betur inni á vellinum og ná því besta út úr liðinu,“ sagði Glódís.

Viðtalið í heild er í spilaranum hér ofar og áramótaþátt Íþróttavikunnar má sjá hér neðar.