„Ég var í sálfræðitíma í FG og það var verið að útskýra ofvirkni. Í fyrsta skipti þá skildi ég bróður minn,“ segir Tobba Marinósdóttir.

Fjölmiðla- og athafnakonan, rithöfundurinn og granóladrottningin Tobba er gestur í Fókus, spjallþætti DV.

Sjá einnig: Tobba skildi eftir skömm og sektarkennd á Jakobsveginum

Tobba var greind með ADHD á fullorðinsárum. Hún segir að eftir á litið hafi hún sýnt merki um ADHD frá barnsaldri, en á þeim tíma var taugaþroskaröskunin ekki eins þekkt og hún er í dag. Á fjölskylduheimilinu virkaði Tobba síðan ekkert svo ofvirk þar sem bróðir hennar var enn fyrirferðarmeiri.

„Ég átti miklu auðveldara með samskipti við bróður minn eftir að ég áttaði mig á því hvað hann væri mikið ofvirkur. Ég var í sálfræðitíma í FG og það var verið að útskýra ofvirkni. Í fyrsta skipti þá skildi ég bróður minn,“ segir Tobba og útskýrir ADHD á mjög einfaldan og skilvirkan hátt.

„Hann kannski situr hérna og við erum að tala saman, hann heyrir jafn mikið í mér og í suðinu í vélinni þarna og í brakinu í stólnum. Og hann hoppar bara á milli, þetta eru þrjár sjónvarpsrásir og hann er að horfa á allar í einu. Svo dettur hann inn og út úr samtalinu því suðið og brakið er að trufla hann, og alltaf þrír sjónvarpsskjáir eða fleiri. Því meira áreiti, eins og að standa úti á götu eða stór veisla, þá eru fleiri sjónvarpsskjáir og þú ert að reyna að fylgjast með öllum en nærð því ekki. Þetta er svo brjálæðislegt álag að þú ferð náttúrulega einhvern veginn að kikna undir því.“

Tobba hefur í gegnum tíðina deilt reynsluheimi bróður síns og nefnir dæmi um það í spilaranum hér að ofan.

Hún ræðir nánar um ADHD-greininguna, gönguna frá Frakklandi til Spánar og granólaævintýrið í þættinum sem má horfa á í heild sinni hér. Einnig er hægt að hlusta á þáttinn á Spotify.