Óskar Hrafn lét af störfum sem þjálfari Breiðabliks eftir tap gegn Stjörnunni í gær. Óskar hafði látið stjórnina vita að hann vildi hætta með liðið í desember en stjórnin vildi að hann myndi hætta strax með liðið. Eins og áður hefur komið fram er Óskar talinn afar ósáttur við þessa ákvörðun stjórnar. Vildi hann fá að stýra liðinu út riðlakeppni Sambandsdeildarinnar.
„Maður er búinn að heyra ýmislegt og allt of mikið í allt sumar. Að það gusti um allt í Smáranum þrátt fyrir þessa velgengni í Evrópu. Það er nú haldin brenna á Gamlárskvöld í Smárahverfi en það mætti segja að það hafi verið brenna frá því í apríl og þar til mótið kláraðist,“ sagði sparkspekingurinn Kristján Óli Sigurðsson í Þungavigtinni í dag.
Rifjaði hann upp þegar Ólafi Kristjánssyni var sagt upp sem yfirmanni knattspyrnumála hjá Breiðabliki á miðju tímabili í sumar. Eiga hann og Óskar ekki að hafa talast við allt tímabilið.
„Ólafur Kristjánsson og þjálfarinn Óskar Hrafn Þorvaldsson töluðust ekki við frá því mótið byrjaði og þar til það var búið. Það að stjórnin komi ekki inn í og leysi þessa deilu er náttúrulega bara galið og stjórnin verður að svara fyrir það. Það vissu þetta allir.“
Kristján segir að þetta hafi ekki átt að fá að viðgangast.
„Yfirmaður knattspyrnumála og þjálfarinn töluðust ekki við. Það er bara ekki eðlilegt. Þar verður einhver að stíga inn í og taka ábyrgð.“
433.is greindi frá því fyrr í dag að leikmenn, starfsmenn og stjórnarmenn Breiðabliks hafi farið út að borða saman í gær og að þar hafi kastast í kekki á milli manna. Endaði það með því að Óskar Hrafn og eiginkona hans Laufey Kristjánsdóttir yfirgáfu staðinn með nokkrum látum samkvæmt heimildum 433.is.
Nánar
Formaðurinn neitar bæði að ræða uppsögn Óskars og uppákomu sem átti sér stað í kvöldverði
