CNN greindi frá því fyrr í dag að maður á sæþotu hafi verið handtekinn, 16. ágúst síðastliðinn, í suður-kóreskri landhelgi fyrir að koma ólöglega inn í landið. Maðurinn mun vera kínverskur andófsmaður og hafði siglt á sæþotu alla leiðinni frá Kína.

Andófsmaðurinn er á fertugsaldri en hann var handsamaður af strandgæslunni skammt undan borginni Incheon á vesturströnd Suður-Kóreu.

Talið er að maðurinn hafi siglt á sæþotunni alls 400 kílómetra leið frá ströndum Shandong héraðs í austurhluta Kína yfir Gulahaf að Incheon.

Þegar maðurinn átti skammt eftir í land í Suður-Kóreu festist hann í leðju og þurfti að hringja í neyðarlínuna til að óska eftir björgun. Hann var hnepptur í varðhald og mál hans er til meðferðar hjá saksóknaraembættinu í Incheon.

Nafn mannsins hefur ekki verið gert opinbert og CNN hefur ekki getað fengið staðfest frá óháðum aðilum að um sé að ræða kínverskan andófsmann.

Samtökin Dialogue China, sem eru samtök þeirra sem hafa mikla reynslu af því að halda uppi andófi gegn kínverskum stjórnvöldum, segja að maðurinn sem um ræðir sé andófsmaðurinn og aðgerðasinninn Kwon Pyong.

Kwon hefur lengi haldið uppi gagnrýni á valdboðsstefnu og ritskoðun kínverskra stjórnvalda.

Hann setti til að mynda inn á Twitter síðu sína, í ágúst 2016, mynd af sjálfum sér í bol með ýmsum orðum sem fólu í sér háð um Xi Jinping forseta Kína, meðal annars orðið „Xitler“. Færslunni var síðar eytt en mánuði eftir að hann birti hana var hann handtekinn.

Kwon er sagður hafa setið í fangelsi fram til 2019 og eftir að hann var látinn laus var hann harð ákveðinn í að flýja land þar sem enn var fylgst með honum og hann sætti jafnframt sömuleiðis rannsókn af hálfu kínverskra yfirvalda. Hann er sagður helst vilja setjast að í enskumælandi landi þar sem hann talar góða ensku eftir að hafa stundað háskólanám í Bandaríkjunum.

Flótti Kwon kemur í kjölfar aukinnar hörku kínverskra stjórnvalda gagnvart mótmælum, ekki síst gegn hörðum sóttvarnarráðstöfunum vegna Covid-19, og hertrar ritskoðunar af þeirra hálfu.