Fyrr í dag tilkynnti Vatíkanið að það myndi afhenda sönnunargögn sem varða hvarf 15 ára stúlku, Emanuela Orlandi, árið 1983, en í dag eru nákvæmlega 40 ár frá hvarfinu. Hún bjó þá ásamt foreldrum sínum og systkinum innan veggja Vatíkansins en faðir hennar var starfsmaður þar.

Emanuela hafði haldið út fyrir Vatíkanið, þann 22. júní 1983, til að fara í tíma í tónlistarskóla í Róm þar sem hún var nemandi en sneri aldrei aftur heim.

Í frétt CNN kemur fram að Vatíkanið hafi verið gagnrýnt alla tíð fyrir það hvernig hvarf stúlkunnar var meðhöndlað en það hafi tilkynnt í janúar síðastliðnum að ný rannsókn hefði verið hafin á málinu. Einn háværasti gagnrýnandinn hefur verið eldri bróðir stúlkunnar sem hefur oft sakað Vatíkanið um að leyna upplýsingum um hvarf systur hans.

Hefur bróðirinn, Pietro Orlandi, boðað til mótmæla næsta sunnudag á meðan páfi flytur sína hefðbundnu predikun.

Í tilkynningu frá Vatíkaninu segir að sönnunargögnum og vitnisburðum hafi verið safnað. Rætt hafi verið m.a. við aðila sem hafi gegnt tilteknum embættum innan veggja þess og stýrt ákveðnum skrifstofum á þeim tíma sem Emanuela hvarf.

Segir í tilkynningunni að ákveðnar vísbendingar hafi fundist við rannsóknina og öllum skjölum sem varða málið verði komið til saksóknaraembættisins í Róm. Óljóst er um hvort ný eða eldri skjöl er að ræða.

Fram kemur í frétt CNN að þetta sé í fyrsta sinn sem að Vatíkanið tilkynni opinberlega að það hyggist afhenda ítölskum yfirvöldum skjöl af einhverju tagi.

Rannsókn Vatíkansins virðist lokið en í tilkynningunni segir að störfum sem varða hana verði eitthvað haldið áfram.

Áhugi á málinu hefur farið vaxandi síðan að þáttaröð um það var frumsýnd á Netflix efnisveitunni á síðasta ári. Þar var atburðarásin rakin og kafað ofan í helstu kenningar um hvað varð um Emanuela Orlandi. Ein sú lífseigasta er að stúlkan hafi orðið fórnarlamb í átökum Vatíkansins og ítölsku mafíunnar um peninga. Önnur er að einhver innan Vatíkansins hafi gert henni mein til að hylma yfir kynferðisbrot í hennar garð.

Grafið hefur verið eftir jarðneskum leifum Emanuela Orlandi á nokkrum stöðum en án árangurs