Það segir lítið að segja við þennan að þetta sé „bara leikur.“ Meðfylgjandi myndskeið hefur vakið mikla lukku á veraldarvefnum í dag en þar má sjá eldri mann fara hamförum af bræði kjölfar þess að lið hans tapaði úrslitaleik á Super Bowl. Milljónir manna fylgdust með fimmtugasta Super Bowl-leiknum sem fór fram í Kaliforníu í nótt þar sem Denver Broncos vann glæsilegan sigur á Carolina Panthers.

Maðurinn sem um ræðir heitir Charles Marvin „Charlie“ Green Jr, einnig þekktur sem „Reiði Afinn“ ( Angry Grandpa) en myndskeið sem sonur hans Michael hefur birt af honum á Youtube undanfarin misseri hafa notið mikilla vinsælda. Eiga myndskeiðin það flestöll sameiginlegt en þar má sjá Michael hrekkja föður sinn sem yfirleitt tekur því óstinnt upp og hikar ekki við að láta reiði sína í ljós á öfgafullan hátt, til að mynda með því að ganga berserksgang og eyðileggja allt sem á vegi hans verður.

Eins og sjá má á nýjasta myndskeiðinu tekst Charles ómögulega að halda aftur af reiði sinni þegar úrslit Super Bowl liggja fyrir enda einn harðasti stuðningsmaður Carolina Panthers.

[youtube https://www.youtube.com/watch?v=KD3B3m6UyZM&w=600&h=360]