Bjarni Benediktsson, fjármálaráðherra og formaður Sjálfstæðisflokksins, kom í Íþróttavikuna með Benna Bó sem sýnd er á Hringbraut á föstudagskvöldum. Gestur með honum var Hjörvar Hafliðason, Dr. Football.
Þeir fóru yfir enska boltann en Bjarni styður Manchester United og hefur gert síðan hann var ungur. Bjarni spilar Fantasy leik enska boltans og er lunkinn spilari. Hjörvar, er í topp tíu á Íslandi, kom með ráð fyrir Bjarna þegar var verið að ræða um Brasilíumanninn Antony.
Benedikt Bóas, þáttastjórnandi, vildi vita hvað brassinn kæmi með til borðsins en Hjörvar vildi gefa honum tíma. Upphófst svo atburðarrás þar sem Hjörvar og Bjarni yfirtóku þáttinn.
„Hann er ekki í fantasy liðinu hjá mér,“ sagði Bjarni og Hjörvar greip boltann á lofti. „Ég skal gefa þér fantasy ráð. Þetta er ekki leikmaðurinn sem þú vilt. Þú verður að skoða vítaskyttur. Ertu kominn með Brúnó?
Hann er á leið í double gameweek. Þú verður að fara hugsa mikið lengra,“ sagði Hjörvar.
Ráðherrann benti á að hann væri með tvo leikmenn frá Manchester United í sínu liði. „Luke Shaw og Marcus Rashford,“ giskaði Hjörvar á.
Bjarni hugsaði sig smá um áður en hann svaraði. „Rashford er inni.“
Þá skaut Benedikt inn í að hann væri búinn að missa alla stjórn á þessum þætti og skipti í auglýsingar. „Hvað er að gerast hérna í þessum þætti?“ spurði hann forviða.
